யூபிலி ஆண்டில் தூய ஆவியின் ஆற்றலினால் புதுப்பிக்கப்பட்டவர்களாக..
மெரினா ராஜ் – வத்திக்கான்
தூய ஆவியாரின் ஆற்றலினால் இந்த யூபிலி ஆண்டில் புதுப்பிக்கப்பட்டவர்களாக வாழ்வை மீண்டும் தொடங்குங்கள் என்றும், ஆண்டவராம் இயேசு கிறிஸ்துவின் எதிர்நோக்கை இவ்வுலகில் உள்ள எல்லாருக்கும் கொண்டு செல்லுங்கள் என்றும் வலியுறுத்தினார் திருத்தந்தை 14-ஆம் லியோ.
ஜூன் 8, ஞாயிறு பெந்தகோஸ்து பெருவிழாவை முன்னிட்டு வத்திக்கான் வளாகத்தில் நடைபெற்ற திருப்பலியின் நிறைவில் வழங்கிய மூவேளை செப உரையின்போது இவ்வாறு எடுத்துரைத்தார் திருத்தந்தை 14-ஆம் லியோ.
பெந்தகோஸ்து பெருவிழா திருப்பலிக் கொண்டாட்டத்தை நிறைவு செய்வதற்கு முன்பாக, இத்திருப்பலியில் நேரடியாகவும் சமூக ஊடகங்கள் வழியாகவும் பங்கேற்ற அனைவரையும் அன்புடன் வாழ்த்திய திருத்தந்தை அவர்கள், கர்தினால்கள், ஆயர்கள், திருஅவைச் சங்கங்கள் மற்றும் இயக்கங்கள், புதிய சமூகங்களின் பிரதிநிதிகள் அனைவருக்கும் நன்றி தெரிவித்தார்.
இத்தாலியிலும் பிற நாடுகளிலும், கல்வி ஆண்டு முடிவுக்கு வருவதை நினைவுகூர்ந்த திருத்தந்தை அவர்கள், இளைஞர்கள், அனைத்து மாணவர்கள், அவர்களின் ஆசிரியர்கள், குறிப்பாக வரும் நாட்களில் தங்கள் கல்வியாண்டின் நிறைவில் தேர்வு எழுதும் மாணவர்கள் அனைவரையும் வாழ்த்த விரும்புவதாக எடுத்துரைத்தார்.
கன்னி மரியாவின் பரிந்துரையின் வழியாக, தூய ஆவியாரிடமிருந்து அமைதியின் பரிசை வேண்டிக்கொள்வோம் என்று தெரிவித்த திருத்தந்தை அவர்கள், முதலாவதாக, நம் இதயங்களில் அமைதியைப் பெற வேண்டுவோம் என்றும் கூறினார்.
அமைதியான இதயம் மட்டுமே குடும்பத்திலும், சமூகத்திலும், பன்னாட்டு உறவுகளிலும் அமைதியைப் பரப்ப முடியும் என்றும், போர் உள்ள இடங்களிலும் உயிர்த்தெழுந்த கிறிஸ்துவின் ஆவியின் ஆற்றல் நல்லிணக்கத்திற்கான பாதைகளைத் திறக்கட்டும் என்றும் கூறினார் திருத்தந்தை.
மேலும் கிறிஸ்துவின் இத்தகைய ஆற்றல், ஆட்சி செய்பவர்களுக்கு அறிவொளியூட்டட்டும் என்று கூறிய திருத்தந்தை அவர்கள், மனந்திரும்புதல் மற்றும் உரையாடலுக்கான அடையாளச் செயல்களைச் செய்ய அவர்களுக்கு துணிவை அளிக்கட்டும் என்றும் தெரிவித்தார்.
இந்த செய்தியை வாசித்ததற்கு நன்றி. நீங்கள் தொடர்ந்து எங்களது அண்மைச் செய்திகளைப் பெற விரும்பினால் “செய்தி மடல்” என்பதைத் தொட்டு பதிவுசெய்ய உங்களை அழைக்கின்றோம். இங்கே கிளிக் செய்யவும்
