கேரளாவில் மறைந்த முன்னாள் முதல்வருக்கு தலத்திருஅவை அஞ்சலி!
செல்வராஜ் சூசைமாணிக்கம் - வத்திக்கான்
ஜூலை 21, இத்திங்களன்று, கேரளாவின் மூத்த கம்யூனிஸ்ட் தலைவரும் முன்னாள் மாநில முதல்வருமான வி.எஸ். அச்சுதானந்தன் அவர்கள் தனது 101 வயதில் மரணித்ததைத் தொடர்ந்து அவரது மறைவுக்கு கேரள கத்தோலிக்க ஆயர்கள் இரங்கல் தெரிவித்துள்ளனர்.
சமூக நீதி, ஊழலை எதிர்த்துப் போராடுதல், சுற்றுச்சூழல் பாதுகாப்பு மற்றும் ஓரங்கட்டப்பட்ட சமூகங்களின் நலனுக்கான வி.எஸ். அச்சுதானந்தன் அவர்களின் வாழ்நாள் அர்ப்பணிப்பை பாராட்டியுள்ளனர் ஆயர்கள்.
கடந்த 2006-ஆம் ஆண்டு முதல் 2011-ஆம் ஆண்டு வரை கேரள மாநிலத்தின் முதல்வராகப் பணியாற்றிய வி.எஸ். அச்சுதானந்தன் அவர்கள், அரசியல் வேறுபாடுகளைக் கடந்து சாமானிய மக்களின் தலைவராக அறியப்பட்டார் என்றும் மேலும் கூறியுள்ளனர் ஆயர்கள்.
இந்தியக் கம்யூனிஸ்ட் கட்சி-மார்க்சிஸ்ட் கட்சியை வடிவமைப்பதில் அவரது முக்கிய பங்கையும், நில சீர்திருத்தங்கள் மற்றும் மேம்பாட்டு முயற்சிகளுக்கு அவர் அளித்த பங்களிப்புகளையும் நினைவு கூர்ந்துள்ளார் சீரோ மலபார் கத்தோலிக்க வழிபாட்டு முறை திருஅவையின் தலைவர் ஆயர் இரபேல் தட்டில்.
மேலும் "தனது 80 ஆண்டுகால அரசியல் வாழ்க்கையில், கம்யூனிஸ்ட் கட்சித் தலைவராகவும், பொது மக்களின் தலைவராகவும், அரசியல் பிளவுகளைத் தாண்டி, அசைக்க முடியாத கொள்கைப் பிடிப்புள்ளவராகவும் உருவெடுத்தார்" என்றும் அவரைப் பாராட்டியுள்ளார் ஆயர் தட்டில்.
கடந்த 80 ஆண்டுகளுக்கும் மேலாக முக்கிய அரசியல் பதவிகளை வகித்த வி.எஸ். அச்சுதானந்தன் அவர்கள், பல்வேறு சமூகங்களால் மதிக்கப்பட்டவர். மேலும் கேரள மாநில சட்டமன்றத்தில் நீண்ட காலம் எதிர்க்கட்சித் தலைவராகப் பணியாற்றியவர். அவரது இறுதிச் சடங்கு ஜூலை 23, இப்புதனன்று ஆலப்புழா மாவட்டத்தில் இடம்பெற்றது.
இந்த செய்தியை வாசித்ததற்கு நன்றி. நீங்கள் தொடர்ந்து எங்களது அண்மைச் செய்திகளைப் பெற விரும்பினால் “செய்தி மடல்” என்பதைத் தொட்டு பதிவுசெய்ய உங்களை அழைக்கின்றோம். இங்கே கிளிக் செய்யவும்
