MAP

மூவொரு கடவுள் மூவொரு கடவுள்  

தூய்மைமிகு மூவொரு கடவுள் : ஒன்றிப்பின் அடையாளமான மூவொரு கடவுள்!

நம்மைச் சுற்றி வாழும் எண்ணற்ற துயருறும் மக்களை அவர்கள் வாழும் தீமைநிறை உலகிலிருந்து மீட்க நாம் ஒன்றிணைந்து செயல்படவேண்டும்.
தூய்மைமிகு மூவொரு கடவுள் : ஒன்றிப்பின் அடையாளமான மூவொரு கடவுள்!

செல்வராஜ் சூசைமாணிக்கம் : வத்திக்கான்

(வாசகங்கள் I. நீமொ 8: 22-31   II. உரோ 5: 1-5   III. யோவா 16: 12-15)

இன்று நாம் மூவொரு கடவுளின் பெருவிழாவைக் கொண்டாடுகிறோம்.  இப்பெருவிழா மூவொரு கடவுளின் ஒன்றிப்பை நமக்கு எடுத்துக்காட்டுகின்றது. தந்தை, மகன், தூய ஆவியார் ஆகிய மூன்று ஆட்களும் ஒன்றிப்பை அடிப்படையாகக் கொண்டு செயல்படுகின்றனர். படைத்தல், மீட்டல், காத்தல் ஆகிய முப்பெரும் செயல்கள் இவர்களிடத்தில் வெளிப்படுகின்றன. தந்தை இவ்வுலகைப் படைக்கின்றார், மகன் இவ்வுலகை மீட்கின்றார், ஆவியானவர் மீட்கப்பட்ட உலகைப் பாதுகாக்கின்றார். மூன்று ஆட்களுக்குள்ளும் ஒரே ஞானம், ஒரே திருவுளம், ஒரே வல்லமை, இருப்பதால் ஒன்றிப்பு நிலவுகிறது என்று சிறுவயதிலேயே சின்னக் குறிப்பிடம் வழியாக நமக்குக் கற்றுக்கொடுக்கப்படுகிறது. மூவொரு கடவுள் எப்படி மூன்று ஆள்களாய் இருந்து செயல்படுகின்றார் என்பதை அறிந்துகொள்ள நமக்கு அறிவு மட்டுமே போதாது, மாறாக, இறைநம்பிக்கை தேவைப்படுகிறது. இங்கே இறைநம்பிக்கை என்பது ஞானம் என்றும் பொருள்கொள்ளலாம்.

அறிவு – ஞானம் வேறுபாடு  

பொதுவாக, அறிவிற்கும் ஞானத்திற்கும் வேறுபாடுகள் பல உண்டு. எடுத்துக்காட்டாக, அறிவு என்பது நம்மைச் சுற்றியுள்ள உலகத்தைப் புரிந்துகொள்ளும் திறனை அளிக்கிறது. ஆனால் ஞானம் என்பது வாழ்க்கையில் சிறந்த முடிவுகளை எடுக்க அனுமதிக்கிறது. மேலும் ஞானம் என்பது நல்ல தீர்ப்பு மற்றும் சிக்கலான சூழ்நிலைகளைப் புரிந்துகொள்ளும் திறனை அடிப்படையாகக் கொண்டது. நல்லதைச் செய்யவும், தீமையைத் தவிர்க்கவும் ஞானம் பயன்படுவதால், அது மேன்மையானதாகப் போற்றப்படுகிறது. சாலமோனின் ஞான நூலும், நீதிமொழிகள் நூலும் ஞானத்தின் மேன்மையையும் அதனை அடையும் வழிகளையும் எடுத்துரைக்கின்றன.  "ஆண்டவரிடம் கொள்ளும் அச்சமே ஞானத்தின் தொடக்கம்; தூயவராகிய அவரைப்பற்றிய உணர்வே மெய்யுணர்வு" (காண்க. நீமொ 9:10) என்கிறது நீதிமொழிகள் நூல். ஒன்றைக் கற்றுக்கொள்வது என்பது அறிவு. ஒன்றை உணர்ந்துகொள்வது என்பது ஞானம் என்று எளிமையாகக் கூறலாம். கடவுள் மூன்று ஆட்களாக இருக்கின்றார் என்பதைத் தெரிந்துகொள்வது அறிவு. ஆனால் அவர் ஏன், எதற்காக மூவொரு கடவுளாக இருக்கின்றார் என்பதை நம்பிக்கையால் உணர்ந்துகொள்வது ஞானம். ஆகவே இந்நாளில், நம்மை மீட்பதற்காகவே மூன்று ஆட்களும் ஒரே கடவுளாய் இணைந்திருக்கிறார்கள் என்று இறைநம்பிக்கையில் ஏற்றுக்கொள்வது நமது ஞானத்தின் வெளிப்பாடாக அமைகிறது. ஆக, நமது நம்பிக்கையால் இறைவனின் செயல்பாடுகளை உணர்ந்துகொள்ளத் தூண்டும் ஞானத்தின் மேன்மையைக் குறித்து இன்றைய முதல் வாசகம் நமக்கு எடுத்துரைக்கின்றது. இங்கே இறைவனே ஞானமாகவும் வெளிப்படுகிறார்.

நாம் அறிவுகொண்டு எல்லாவற்றையும் புரிந்துகொள்ள முடியாது. இன்று வரை நம்மில் பலர் இந்த மூவொரு இறைவன் குறித்த கருத்தியலை புரிந்துகொள்ள முடியாமல் தடுமாறுகின்றனர். இது ஒரு புரியாத புதிராகவே இன்றுவரை நீடிக்கிறது. இதைத்தான் மறைபொருள் என்கின்றோம். மெத்த படித்த புனித அகுதிஸ்னாரும் கூட இந்த மறைபொருளைப் புரிந்துகொள்ள முடியாமல் தடுமாறினார். ஆனால், பல வேளைகளில் இந்த மூவொரு இறைவனின் கருத்தியலை படிக்காதப் பாமரர்கள் கூட வெகுசுலபமாகப் புரிந்துகொள்கின்றனர். ஆனால் தங்களை அதிகம் படித்தவர்களாகப் பிதற்றிக்கொள்ளும் சிலரால்தான் கடவுளின் செயல்களைப் புரிந்துகொள்ள முடியாமல் தடுமாறுகின்றனர். காரணம், படித்தவர்களிடம் இருப்பது அறிவுத் தேடல். படிக்காதவர்களிடம் இருப்பது விசுவாசத் தேடல்.

ஒருமுறை கிளைகிராமம் ஒன்றில் மூவொரு இறைவன் பெருவிழாத் திருப்பலியை நிறைவேற்றுவதற்காகப் பங்குத்தந்தை வயல்வழியே நடந்து போய்க்கொண்டிருந்தார். இதனை எப்படி மக்களுக்கு விளக்கிச்  சொல்வது, அப்படியே விளக்கிச் சொன்னாலும் அதை எப்படி அவர்கள் புரிந்துகொள்வார்கள் என்றெல்லாம் சிந்தித்தவாறே சென்றுகொண்டிருந்தார். அப்போது மாடுகளை மேய்த்துக்கொண்டிருந்த விவசாயி ஒருவர், “என்ன சாமி, தீவிரமா யோசித்துக்கொண்டே போறீங்க” என்று பங்குத் தந்தையைப் பார்த்துக் கேட்டார். “இன்று மூவொரு கடவுள் பெருவிழா, அதைப்பற்றி மக்களுக்கு எப்படி புரிய வைப்பதுன்னு தெரியல, அதான் சிந்திச்சுக்கிட்டே போறேன். மனசுலே ஒரே குழப்பமா இருக்கு” என்றார் பங்குத் தந்தை. “இதுல என்ன சாமி குழப்பம்? இத பாருங்க, இந்தச் சிவப்புக் கலர் பசுமாடு, பச்சை கலர் புல்லைத் தின்னுட்டு வெள்ளை கலர் பாலைக் கொடுக்குது.” அவ்வளவுதான். இதுல, சிவப்பு கலர் பசுமாடு தந்தை, பச்சை கலர் புல்லு இயேசு, வெள்ளை கலர் பாலு தூய ஆவி. பசுமாடு, புல்லு, பால் ஆகிய மூன்றுக்கும் எப்படி ஒன்றுக்கொன்று தொடர்பு இருக்கோ அதுமாதிரி இந்தத் தந்தை, மகன், தூய ஆவி மூன்று பேருமே ஒருவருக்கொருவர் தொடர்புடையவங்க என்று ரொம்ப சுலபமா சொல்லுங்க சாமி, மக்கள் புரிஞ்சுக்குவாங்க...” என்று அந்த மாடு மேய்ப்பவர் ஒரு போடு போட்டார். அவ்வளவுதான்... பங்கு சாமியார் அப்படியே பொறி கலங்கிப் போனார்.

மூவொரு கடவுள் ஒன்றிப்பின் அடையாளம்

இரண்டாவதாக, மூவொரு கடவுள் பெருவிழா நமக்கு உணர்த்தும் முக்கியமான கருத்து ஒன்றிப்பு. தந்தை, மகன், தூய ஆவியார் மூவரும் மூன்று ஆட்களாய் இருந்தாலும் எல்லாவற்றிலும் ஒரே கடவுளாய் ஒன்றிந்திருக்கின்றனர். இதைத்தான் ஒரே ஞானம், ஒரே திருவுளம், ஒரே வல்லமை என்று மேலே பார்த்தோம். திருவிலியத்தின் பழைய ஏற்பாட்டில் இறைத்தந்தை மற்றும் தூய ஆவியாரின் நேரடிச் செயல்பாடுகளைக் காணமுடிகிறது. அதேவேளையில் மெசியா என்னும் இயேசுவின் திருவருகைக் குறித்த அறிவிப்பும், அவரது செயல்பாடுகள் எப்படி இருக்கும் என்று இறைவாக்கினர் நூல்களில் எடுத்துக்காட்டப்படுகின்றது. அவ்வாறே, புதிய ஏற்பாட்டிலும் ஆங்காங்கே மூவொரு இறைவனின் செயல்பாடுகளைப் பார்க்கின்றோம். குறிப்பாக இரண்டு இடங்களில் மூவொரு இறைவனின் பிரசன்னம் வெளிப்படுகிறது. முதலாவதாக, இயேசுவின் திருமுழுக்கின்போது மூவொரு இறைவனின் பிரசன்னம் வெளிப்படுகிறது. அப்போது தந்தை தனது அன்புமகனை இவ்வுலகிற்கு அறிமுகம் செய்து வைப்பதில் பூரிப்படைகின்றார். அனைத்து மக்களையும் ஒன்றிக்கும் விதமாக இவரது பணிவாழ்வு இருக்கும் என்பதை இவ்வுலக மக்களுக்குத் தெளிவுபடுத்துகிறார். இயேசு திருமுழுக்குப் பெற்றவுடனே தண்ணீரை விட்டு வெளியேறினார். உடனே வானம் திறந்ததையும் கடவுளின் ஆவி, புறா இறங்குவது போலத் தம்மீது வருவதையும் அவர் கண்டார். அப்பொழுது, “என் அன்பார்ந்த மைந்தர் இவரே. இவர் பொருட்டு நான் பூரிப்படைகிறேன்” என்று வானத்திலிருந்து ஒரு குரல் கேட்டது (மத் 3:16-17). இரண்டாவதாக, உருமாற்ற நிகழ்வின்போது மூவொரு இறைவனின் பிரசன்னத்தைப் பார்க்கின்றோம். "அப்போது ஒரு மேகம் வந்து அவர்கள்மேல் நிழலிட அந்த மேகத்தினின்று, “என் அன்பார்ந்த மைந்தர் இவரே; இவருக்குச் செவிசாயுங்கள்” என்று ஒரு குரல் ஒலித்தது. (மாற் 9:7). இந்நிகழ்வில் இறைத்தந்தை, தனது அன்பு மகனின் தியாக மரணம் குறித்து உலக மக்களுக்கு மீண்டும் உறுதிப்படுத்துகின்றார்.  ஆக, பாவத்தில் உழன்றுபோயிருந்த இவ்வுலகை மீட்பதில் தந்தை, மகன், தூய ஆவியார் மூவரும் ஒன்றிணைந்து செயல்படுவதைக் காண முடிகிறது.

இயேசு தனது பணிவாழ்வு முழுவதும் இறைத்தந்தைக் குறித்தும் தூய ஆவியார் குறித்தும் பேசுகின்றார். மிகவும் சிறப்பாக, யோவான் நற்செய்தியில் மூவொரு இறைவனின் ஒன்றிப்புக் குறித்து அதிகம் பேசுவதாக நற்செய்தியாளர் யோவான் எடுத்துக்காட்டுகின்றார். குறிப்பாக, இன்றைய நற்செய்தியில், "உண்மையை வெளிப்படுத்தும் தூய ஆவியார் வரும்போது அவர் முழு உண்மையை நோக்கி உங்களை வழிநடத்துவார். அவர் தாமாக எதையும் பேசமாட்டார்; தாம் கேட்பதையே பேசுவார்; வரப்போகிறவற்றை உங்களுக்கு அறிவிப்பார். அவர் என்னிடமிருந்து கேட்டு உங்களுக்கு அறிவிப்பார். இவ்வாறு அவர் என்னை மாட்சிப்படுத்துவார். தந்தையுடையவை யாவும் என்னுடையவையே. எனவேதான் ‘அவர் என்னிடமிருந்து பெற்று உங்களுக்கு அறிவிப்பார்’ என்றேன்" (வச.13-15) என இயேசு கூறும் வார்த்தைகளில் மூவொரு கடவுள் குறித்த ஒன்றிப்பு முழுமையாக வெளிபடுவதைப் பார்க்கின்றோம். மேலும் மூவொரு கடவுளை முக்கோண வடிவத்தில் அடையாளப்படுத்துகிறோம். முக்கோணத்திலுள்ள மூன்று பக்கங்களும் சம அளவில் ஒன்றோடு ஒன்று இணைந்து பிணைந்திருக்கும். அதுபோலவே மூவொரு இறைவனும் ஒரே ஞானம், ஒரே திருவுளம், ஒரே வல்லமை என சம அளவில் இணைந்துள்ளனர்.

மூவொரு கடவுளின் ஒன்றிப்பைக் குறிக்கும் முக்கோண வடிவம்
மூவொரு கடவுளின் ஒன்றிப்பைக் குறிக்கும் முக்கோண வடிவம்

மீட்புத் திட்டத்தில் மூவொரு கடவுள்

மூன்றாவதாக, இவ்வுலகை மீட்பதில் மூவரும் ஒன்றிணைந்து செயல்பட்டனர் என்ற ஒரு முக்கியமானதொரு கருத்தையும் இன்றைய நாள் பெருவிழா நமக்கு உணர்த்துகிறது. அது ஒரு மிகப்பெரிய கிராமம். அதில் பல்வேறு இனத்தவரும் மொழியினரும் வாழ்ந்து வந்தனர். இதன் காரணமாக அவர்களிடத்தில் பல்வேறும் பிரிவுகளும் பிணக்குகளும் நிலவின. நாளொரு மேனியும் பொழுதொரு வண்ணமுமாக அவர்களிடத்தில் வேற்றுமைகளும், சண்டை சச்சரவுகளும் வளர்ந்துகொண்டே வந்தன. அதேகிராமத்தில் ஓர் ஏழைக் குடும்பம். அக்குடும்பத்தின் தந்தை மிகவும் நல்ல மனிதர். அவருக்கு இரண்டு ஆண் குழந்ததைகள் இரண்டாவது குழந்தை பிறந்த சில நாட்களிலேயே அவரின் மனைவி இறந்துவிட்ட நிலையில், தாய்க்குத் தாயாக இருந்து அந்த இரண்டு ஆண் குழந்தைகளையும் அவரே மிகவும் பொறுப்பாக வளர்த்து வந்தார். அக்குழந்தைகள் வளரும்போதே நற்குணங்களையும் கற்றுக்கொடுத்தார். குறிப்பாக, தனது நலனைக் காட்டிலும் பிறர் நலனுக்காகவும் இந்தச் சமுதாயத்தின் நலனுக்காகவும் நம் வாழ்வையே அர்ப்பணிக்க வேண்டும் என்ற உயர்த்த விழுமியத்தையும் சொல்லிக் கொடுத்தார். அவர்கள் வளர்ந்து சிம்சோனைப் போல தெய்வபயமும், வலிமையும், சமுதாய அக்கறையும் ஒருங்கேபெற்ற இளையோராக அக்கிராமத்தில் வலம் வந்தனர். அங்கே நிலவிய வேறுபாடுகளும் மாறுபாடுகளும் தான் அந்தக் கிராமத்தின் வளர்ச்சிக்குத் தடைகளாக இருக்கின்றன என்பதை அறிந்த மூத்த மகன் எல்லா இனத்தவரிடமிருந்தும் தன்கருத்தையொத்த இளையோரைத் தெரிவு செய்து, அவர்களுக்கு விழிப்புணர்வூட்டி அக்கிராமத்தின் வளர்ச்சிக்காகப் பாடுபடத் தொடங்கினார். அவர்களின் செயல்படுகள் அக்கிரமத்திலுள்ள பலருக்கு மகிழ்ச்சியைத் தந்தன.

தனது மூத்த மகனின் தன்னலமற்ற தியாகச் சேவைகளை எண்ணி உளம் பூரித்தார் தந்தை. ஆனால் அவரின் மகிழ்ச்சி நீடித்து நிலைக்கவில்லை. காரணம், அக்கிராமத்தில் மிக உயர்ந்த நிலையில் இருந்த பணக்காரர்கள் ஒன்று திரண்டு அவனுக்கெதிராய் சூழ்ச்சிகளை அரகேற்றி, பல கட்டுக்கதைகளைக் கட்டவிழ்த்துவிட்டனர். காலங்காலமாய் தங்கள் இனத்தை சேர்ந்தவர்கள் மட்டுமே அவ்வூரின் அதிகார நாற்காலியில் அமர வேண்டும் என்பதற்காகத் திட்டங்கள் தீட்டி கூலிப்படையினரை ஏவி அந்த நல்ல தந்தையின் மூத்த மகனை கொன்றுபோட்டனர். இதனால், செய்வதறியாது திகைத்த அவனின் நல்ல நண்பர்கள் அனைவரும் திசைக்கொருவராய் சிதறுண்டு போனார்கள். நடப்பதைக் கண்டு நாசவேலை செய்தவர்கள் நகைத்தார்கள். ஊரினை ஒன்றிணைக்கத் திட்டமிட்ட தன் அன்பு மகனின் ஆசை நிறைவேறவில்லையே என்று வருந்தினார் அந்தத் தந்தை. அப்போது புயலாய்ப் புறப்பட்டு வந்தார் இளைய மகன்.“அப்பா கவலை வேண்டாம் உங்களுக்கு. அண்ணன் விட்டுச்சென்ற அன்புப் பணியை நான் தொடர்கிறேன்”என்று கூறி விட்டு சிதறுண்டு போன தன் அண்ணனின் நல்ல நண்பர்கள் அனைவரையும் தேடிக்கொணர்ந்து ஒன்றினணத்தார். மூத்தவனைக் கொன்றுவிட்டால் தந்தை பின்வாங்கிவிடுவார், இளைய மகனும் அரண்டுபோய் ஓடிவிடுவார் என்று தப்புக்கணக்குப் போட்ட அவ்வூர் சதிகாரர்களின் சதித்திட்டங்கள் தவிடுபொடி ஆயின. இளைய மகனின் செயல் ஒரு புதிய சமுதாயத்தை நோக்கிய பாதையில் அப்பெரும் கிராமத்தை மீண்டும் புறப்படச் செய்தது. இக்கதையில் வரும் தந்தை மகன்களைப்போல, தீமைகளும் பாவங்களும் நிறைந்த இவ்வுலகை மீட்க மூவொரு இறைவன் நிகழ்த்திய தியாகம்நிறை செயல்களை நம்மால் மறந்துவிட முடியாது.  

இதைத்தான் இன்றைய இரண்டாம் வாசகத்தில், "துன்பத்தால் மன உறுதியும், மன உறுதியால் தகைமையும், தகைமையால் எதிர்நோக்கும் விளையும் என அறிந்திருக்கிறோம். அந்த எதிர்நோக்கு ஒருபோதும் ஏமாற்றம் தராது; எனெனில், நாம் பெற்றுள்ள தூய ஆவியின் வழியாய்க் கடவுளின் அன்பு நம் உள்ளங்களில் பொழியப்பட்டுள்ளது" (உரோ  5:3-5) என்கிறார் புனித பவுலடியார். பிறர்நலன் சார்ந்த நற்செயல்களில் நம்மையே நாம் கரைத்துக்கொள்ளும்போது, நாம் பயணம் மேற்கொள்ளும் பாதைகளில் எத்தனை தடைக்கற்கள் குறுக்கிட்டாலும் அவைகள் ஒருபோதும் நமக்கு ஏமாற்றத்தைத் தராது என்பதையும் உணர்வோம். ஆகவே நமது அன்றாட வாழ்வில் நம்மைச் சுற்றி வாழும் எண்ணற்ற துயருறும் மக்களை அவர்கள் வாழும் தீமைநிறை சூழலிலிருந்து மீட்க நாம் ஒன்றிணைந்து செயல்பட வேண்டும் என்பதை மூவொரு கடவுளின் பெருவிழா நமக்கு நினைவூட்டுகிறது. இதனை நன்கு புரிந்துகொண்டு செயல்பட இந்நாளில் இறையருள் வேண்டி மன்றாடுவோம்.

இந்த செய்தியை வாசித்ததற்கு நன்றி. நீங்கள் தொடர்ந்து எங்களது அண்மைச் செய்திகளைப் பெற விரும்பினால் “செய்தி மடல்” என்பதைத் தொட்டு பதிவுசெய்ய உங்களை அழைக்கின்றோம். இங்கே கிளிக் செய்யவும்

14 ஜூன் 2025, 12:30