Узор цыркулярнай эканомікі: Папа адкрые “Мястэчка “Laudato si'”
Аляксандр Амяльчэня - Vatican News
“Мястэчка Laudato si'” размяшчаецца на тэрыторыі 55 гектараў, якія раней уваходзілі ў склад "Папскіх віл". З іх каля 30 гектараў прызначаны для сельскагаспадарчых мэт у кантэксце старажытнай рымскай вілы Даміцыяна – месца незвычайнай прыгажосці з рэшткамі вялікай гісторыка-археалагічнай каштоўнасці.
Адукацыя і практыка ў гарманічным спалучэнні
У гэтай мясцовасці, якая нібы ўзносіцца паміж возерам і морам, была створана інтэграваная сістэма, што складаецца, з аднаго боку, з Цэнтра вышэйшай адукацыі “Laudato si'” – адукацыйнага стаўпа праекта, а з другога – з сістэмы сельскагаспадарчай вытворчасці, дзе актыўна прымяняюцца прынцыпы інтэгральнай экалогіі.
У Мястэчку штогод будуць навучацца 2-3 тысячы студэнтаў з усяго свету, накіраваныя рознымі дыяцэзіямі. Частка студэнтаў, сярод якіх таксама людзі з інваліднасцю, будзе працаваць у рэстаране, які ствараецца ў партнёрстве з буйной амерыканскай сеткай, іншыя вернуцца ў свае краіны, каб выкарыстаць там набытыя веды.
Біядынаміка і фотавальтаіка: тэхналогіі на службе прыроды
Практычная частка адукацыі будзе праходзіць на землях Мястэчка (у асноўным прызначаных для біядынамічных вінаграднікаў, з навуковай дапамогай універсітэта Удзінэ) і часткова ў вялікай сучаснай цяпліцы, якая працуе на сонечных батарэях. Плануецца ўкараненне сістэмы агравальтаікі, якая спалучае на адной тэрыторыі вырошчванне сельскагаспадарчых культур і вытворчасць энергіі.
Усе аб'екты Мястэчка можна будзе наведаць – чакаецца, што сюды будзе прыязджаць да 250 тысяч чалавек у год. Уваход будзе платным, але людзі з фінансавымі цяжкасцямі змогуць увайсці бясплатна.
Ад школьнікаў да кіраўнікоў карпарацый
У Цэнтры вышэйшай адукацыі будуць прымаць студэнтаў рознага ўзросту – ад пачатковай школы да ўніверсітэта і выпускнікоў. Акрамя таго, тут будуць праводзіцца заняткі для кіраўнікоў буйных кампаній. Невыпадкова ў пятніцу, падчас візіту Папы, чакаецца невялікая дэлегацыя высокапастаўленых кіраўнікоў на чале з Полам Палманам, былым кіраўніком “Unilever”, а сёння адным з найбуйнейшых прыкладаў бізнес-лідараў, занятых у сферы ўстойлівай эканомікі.
Вяртанне да аўтэнтычнасці: людзі, жывёлы і простыя каштоўнасці
Сярод тых, хто будзе вітаць Святога Айца, – сем'і 39 супрацоўнікаў Мястэчка, многія з якіх працуюць садоўнікамі. Шматлікія жывёлы нададуць асаблівы шарм мясцовым палям. Сюды вернуцца і андалузскія коні, падораныя Папу Льву XIV.
Гэты падарунак мае сімвалічнае значэнне, бо ў Перу Пантыфік часта выкарыстоўваў для сваіх паездак менавіта невялікіх коней – сімвал той простай і аўтэнтычнай існасці жыцця, якую так імкнецца адкрыць сучасны чалавек.
