Святы Пасад заклікаў падтрымаць краіны без выхаду да мора
Марыя Валодзіна - Vatican News
Дэлегацыю Святога Пасада на трэцяй Міжнароднай канферэнцыі, прысвечанай праблемам краін без выхаду да мора, якая 6 жніўня 2025 года прайшла ў Авазе (Туркменістан), узначаліў мансіньёр Арно дзю Шэйрон дэ Бамон.
Прадстаўнік Святога Пасада падкрэсліў неабходнасць доўгатэрміновай і рэальнай дапамогі дзяржавам без выхаду да мора, якія ідуць па шляху развіцця. Прыняцце ў Авазе Праграмы дзеянняў з'яўляецца важным крокам у гэтым кірунку, аднак яе ажыццяўленне павінна падмацоўвацца канкрэтнай палітычнай воляй.
Краіны, якія не маюць выхаду да мора, хоць і адрозніваюцца сваімі геаграфічнымі, культурнымі і эканамічнымі асаблівасцямі, тым не менш, сутыкаюцца з аднолькавымі “сістэмнымі праблемамі”, такімі як непрымальны даўгавы цяжар, высокія транспартныя выдаткі, уразлівасць да змены клімату, - адзначыў дыпламат.
Самай сур'ёзнай і неадкладнай праблемай застаецца беднасць, асабліва ў сельскіх раёнах, дзе часта бракуе асноўных паслуг і магчымасцяў. Іерарх адзначыў, што беднасць не з’яўляецца непазбежнай, а вынікае з “несправядлівых структур і палітычных рашэнняў”, і таму яе можна і трэба пераадолець.
Дыпламат звярнуў увагу на несправядлівыя ўмовы міжнароднага гандлю і заклікаў будаваць гандаль на прынцыпах справядлівасці, салідарнасці і ўсеагульнага прызначэння дабротаў. Апошні значыць, што "для кожнага чалавека і для ўсіх народаў павінны быць створаны ўмовы, неабходныя для ўсебаковага развіцця, каб кожны мог унесці свой уклад у стварэнне больш гуманнага свету". Ён таксама заклікаў спрыяць навукова-тэхнічнай аўтаноміі краін, якія ідуць па шляху развіцця, шляхам абмену ведамі і тэхналогіямі.
Напрыканцы прамовы прадстаўнік Святога Пасада падкрэсліў, што ў цэнтры кожнай стратэгіі развіцця павінен заставацца чалавек, а гандаль і эканамічны рост – гэта не самамэта, а сродак для ўсебаковага развіцця кожнага чалавека і дасягнення агульнага дабра.
