Ватыканскія музеі: завершана рэстаўрацыя Залы Канстанціна
Марыя Валодзіна - Vatican News
26 чэрвеня 2025 года у Ватыканскіх музеях адбудзецца прэзентацыя адрэстаўраванай Залы Канстанціна з удзелам дырэктара Барбары Яты, куратараў і рэстаўратараў.
Рэстаўрацыйныя працы пачаліся ў сакавіку 2015 года з аднаўлення фрэскі "Відзенне Крыжа" на ўсходняй сцяне і скончыліся ў снежні 2024 года рэстаўрацыяй вялікага жывапіснага габелена, які ўпрыгожвае скляпенне залы.
Праект ажыццявілі ватыканскія спецыялісты пры падтрымцы мецэнатаў з амерыканскай ініцыятывы "Patrons of the Arts in the Vatican Museums".
Рэстаўрацыя дазволіла аднавіць першапачатковыя мастацкія якасці роспісаў Рафаэля, а таксама адкрыла новыя магчымасці для вывучэння гісторыі, тэхнікі і асаблівасцяў іх мастацкага выканання.
Зала Канстанціна, прысвечаная рымскаму імператару, які даў хрысціянам свабоду веравызнання, з’яўляецца ўнікальным помнікам эпохі Адраджэння. У гістарычных дакументах яна называлася Aula pontificum superior для адрознення ад Aula pontificum inferior, якая знаходзілася паверхам ніжэй у апартаментах Борджа. Зала прызначалася для афіцыйных падзей: кансісторыяў, урачыстых прыёмаў.
Памяшканне ўпрыгожвалі ў некалькі этапаў: пры Папах Льве X і Кліменце VII Рафаэль і яго майстэрня выканалі галоўныя фрэскі: "Відзенне Крыжа", “Бітва Канстанціна з Максенцыем”, “Хрост Канстанціна” і “Дар Рыма”. Пры Папе Паўле III працу працягваў Себасцьяна дэль П’ёмба, а пры Грыгорыі XIII і Сіксце V яго вучань Тамаза Лаўрэці завяршыў роспіс скляпення з знакамітай цэнтральнай фрэскай “Трыумф хрысціянства над паганствам”.
Сёння пасля дзесяцігадовай рэстаўрацыі можна ў поўнай меры ацаніць мастацкае багацце і разнастайнасць Залы Канстанціна, у афармленні якой спалучаюцца розныя стылі і тэхнікі, адлюстроўваючы эвалюцыю рымскага жывапісу XVI стагоддзя.
