Кардынал Мендонса: спартсмены пакліканы быць місіянерамі надзеі
Аляксандр Панчанка - Vatican News
“Мы вельмі спадзяёмся, што гэты Юбілей спорту зможа абудзіць у спартсменах і шырокай зацікаўленай публіцы ўсведамленне таго, што і яны з’яўляюцца місіянерамі надзеі”, - падкрэсліў іерарх.
Кардынал Мендонса паведаміў, што ў суботу, 14 чэрвеня, на Плошчы Святога Пятра адбудзецца спецыяльная юбілейная аўдыенцыя, падчас якой Папа Леў XIV прамовіць катэхезу. Затым у Папскім патрыстычным інстытуце “Аўгустыніянум” пройдзе міжнародны кангрэс “Імпульс надзеі” з удзелам некаторых выбітных спартсменаў.
“Праз узаемнае слуханне мы хочам пачуць галасы тых, хто непасрэдна займаецца спортам, а таксама тых, хто працуе ў душпастырстве спартсменаў. Мэта сустрэчы – распазнаць шляхі, якімі трэба ісці, каб спорт усё больш станавіўся знакам надзеі для ўсіх”, - адзначыў прэфект.
Падчас кангрэсу будуць падведзены вынікі моладзевага фотаконкурсу “Sport in Motion”, які праводзіла Дыкастэрыя па справах культуры і адукацыі. Пераможцам уручаць прызы ў пяці катэгорыях: спорт і сям’я, спорт і інваліднасць, спорт і палітыка, спорт і экалогія, спорт і надзея.
У другой палове дня ўсе спартсмены і аматары спорту будуць запрошаны здзейсніць супольны праход праз Святую Браму Базілікі Святога Пятра. Пілігрымка пачнецца малітвай на рымскай П’яца Пія і будзе суправаджацца спевамі экуменічнай Супольнасці з Тэзэ. У ёй возьме ўдзел старшыня Міжнароднага алімпійскага камітэта Томас Бах.
Часткай культурнай праграмы Юбілею стане адкрыты паказ кінастужкі Х’ю Хадсана “Вогненныя калясніцы”, які адбудзецца ўвечары на рымскай плошчы Сан-Казымата ў раёне Трастэверэ. “Гэты фільм мае і сёння што сказаць нам”, - падкрэсліў кардынал Жазэ дэ Мендонса.
Кульмінацыйнай падзеяй Юбілею спорту стане святая Імша, якую Папа Леў XIV узначаліць раніцай 15 чэрвеня на галоўнай ватыканскай плошчы.
