Юбілей 2025: Рым напоўніўся гукамі духавых аркестраў
Аляксандр Амяльчэня - Vatican News
Юбілей Духавых Аркестраў і Фальклорных Калектываў ператварыў Рым у маштабны міжнародны фестываль. На Віа-дэла-Канчыліяцыёнэ, якая прылягае да Плошчы Святога Пятра, пілігрымкі плаўна пераходзяць у яркія фальклорныя прадстаўленні, прыцягваючы ўвагу турыстаў і мясцовых жыхароў.
Для многіх гэта здзяйсненне мар
Адным з найбольш заўважных калектываў стаў мексіканскі ансамбль "Panteras Rebolledo Marching Band" з Веракруза. Даніэль, апрануты ў традыцыйны ацтэкскі галаўны ўбор, падзяліўся з “Vatican News”: "Мы ганарымся, што можам паказаць нашу лацінаамерыканскую культуру". Ён асабліва адзначыў сімвалічнасць моманту – Юбілей адбываецца ў дні абрання новага Папы, які раней быў місіянерам у Перу.
Марыя, кіраўнік аркестра, які аб'ядноўвае моладзь ад 8 да 16 гадоў, падкрэсліла, што для юных музыкантаў гэта неверагодная магчымасць. Дырыжор Хесус дадаў: "Музыка – наш свет, але ў першую чаргу дар ад Бога".
Італьянскія калектывы таксама актыўна ўдзельнічаюць у Юбілеі. Аркестр з Колекарвіна (правінцыя Пескара) ужо выступаў тут падчас Юбілею 1975 года. "Гэта хвалюючае вяртанне", - адзначыў Іва Падула.
Універсальная мова, якая пераадольвае бар'еры
Капельмайстар Габрыэле (27 гадоў) верыць у "лепшы свет, поўны міру і надзеі". Сандра, габаіст з амаль паўвекавым стажам, падкрэсліў унікальную здольнасць музыкі пераадольваць культурныя і моўныя бар'еры.
Лідар аднаго з аркестраў Андрэа Качыяторэ назваў падзею "падвойным святам": "Мы музыканты, але таксама глыбока веруючыя людзі. Мы хочам прайсці праз Святую Браму ў фальклорным, але перш за ўсё рэлігійным духу". "Мы будзем маліцца за новага Папу Льва XIV, каб ён працягнуў лінію Францішка з акцэнтам на дапамогу бедным і набліжэнне людзей да Касцёла", - дадаў ён.
Сільвана Праеці, старшыня аркестра з Сан-Грэгорыа-да-Сасола, выказаў надзею на аб'яднаўчую сілу музыкі: "Музыка заўсёды была часткай духоўнасці і Касцёла. Апекуном нашага аркестра з'яўляецца Папа Грыгорый Вялікі, найвыбітнейшы інтэрпрэтатар грыгарыянскага харалу – каштоўнасці, якая ўзбагачае Касцёл".
Юбілейныя мерапрыемствы, арганізаваныя ў рамках Юбілею 2025 года, уключаюць канцэрты больш чым 100 калектываў на 31 плошчы Рыма і завершацца 12 мая 2025 года ўрачыстай Імшой на рымскай Плошчы Кавур.
