Новы імшал для эрытрэйскіх і эфіопскіх католікаў
Аляксандр Амяльчэня - Vatican News
Прэфект Дыкастэрыі па справах Усходніх Цэркваў, кардынал Клаўдыё Гуджэроці, падкрэсліў: “У такі складаны момант для Эрытрэі і Эфіопіі, гэты імшал – крыніца надзеі, крыніца здольнасці жыць і марыць, што складае корань існавання народу”. “Няхай праз гэту літургічную кнігу эрытрэйцы і эфіопцы зноў адчуюць шчырую дабрыню Бога і ласку Дзевы Марыі”, - дадаў ён.
Праца над літургічным тэкстам вялася некалькі гадоў двума камісіямі з Эрытрэі і Эфіопіі, з улікам традыцый і крыніц мясцовых Цэркваў, а таксама абнаўленняў згодна з рашэннямі Другога Ватыканскага Сабора і Кодэкса канонаў Усходніх Цэркваў. Імшал распрацаваны для каля 500 тысяч вернікаў.
Падчас прэзентацыі новыя літургічныя тэксты былі ўрачыста перададзены іерархам з двух краін. Удзельнікі згадалі падтрымку, якую выказаў Папа Леў XIV католікам усходніх абрадаў у яго нядаўняй прамове да ўдзельнікаў Юбілею Усходніх Цэркваў.
