Восьмая кангрэгацыя: кардыналы абмяркоўваюць будучыню Касцёла
Аляксандр Амяльчэня - Vatican News
2 мая 2025 года ў Зале Друку Святога Пасада адбыўся брыфінг, які правёў Матэа Бруні. Падчас яго былі прадстаўлены падрабязнасці восьмага пасяджэння кардыналаў, якое пачалося ў 9.00 з супольнай малітвы і працягвалася да 12.30.
На кангрэгацыі прысутнічала больш за 180 кардыналаў, з якіх больш за 120 з'яўляюцца выбаршчыкамі. Прыезду ў Рым чацвярых кардыналаў-выбаршчыкаў яшчэ чакаюць. Падчас перапынку ў 10.30 новапрыбыўшыя кардыналы прынеслі прысягу.
Евангелізацыя застаецца сэрцам сучаснага Касцёла
Паводле інфармацыі, якую падаў прэс-сакратар, каля 25 кардыналаў выступілі з прамовамі, закранаючы шырокі спектр тэм. Абмяркоўвалася евангелізацыя як цэнтральная тэма пантыфікату Францішка і разуменне Касцёла як братэрскай супольнасці для евангелізацыі. Асаблівая ўвага была нададзена прапаведаванню Евангелля, асабліва сярод моладзі.
Удзельнікі пасяджэння закранулі таксама пытанні, звязаныя з Усходнімі Цэрквамі, іх пакутамі і сведчаннем. Абмяркоўвалася эфектыўная евангелізацыя на ўсіх узроўнях – ад парафій да Рымскай курыі, а таксама тэма еднасці.
Адкрытасць да праўды і пераемнасць – ключ да абнаўлення
Сярод важных пытанняў, якія падымаліся на пасяджэнні, былі таксама скандалы, звязаныя з сексуальнымі і фінансавымі злоўжываннямі, цэнтральная роля літургіі і Кодэкса Кананічнага Права, а таксама сінадальнасць і калегіяльнасць.
Кардыналы падкрэслілі важнасць пераемнасці трох апошніх пантыфікатаў і цэнтральную ролю Эўхарыстыі ў жыцці Касцёла. Варта адзначыць, што абмеркаванні закраналі як духоўныя, так і практычныя аспекты дзейнасці Касцёла ў сучасным свеце.
Латынь – мова канклава, але Касцёл гучыць на розных мовах
Журналісты пацікавіліся, на якіх мовах праходзяць канклаў і кангрэгацыі кардыналаў. Канклаў мае афіцыйную мову – латынь, але паміж сабой кардыналы размаўляюць на розных мовах, растлумачыў Бруні.
Ён таксама дадаў, што падчас кангрэгацый арганізаваны сінхронны пераклад “на шэсць-сем моў”, каб кожны ўдзельнік мог дадаваць свае думкі і быць пачутым.
Дыялог працягваецца: новыя сустрэчы
Паводле інфармацыі, агучанай кіраўніком Залы Друку, наступныя кангрэгацыі кардыналаў запланаваны на 3, 5 і 6 мая 2025 года. Чакаецца, што абмеркаванні працягнуцца з улікам ужо агучаных тэм і, магчыма, закрануць новыя аспекты жыцця і місіі Каталіцкага Касцёла.
