Велікодную Імшу ў Ватыкане ўзначаліць кардынал Камастры
Аляксандр Панчанка - Vatican News
Святочная літургія, якую ад імя Пантыфіка ўзначаліць 81-гадовы архіпрэзбітэр-эмерыт Базылікі Святога Пятра і Папскі вікарый-эмерыт для Дзяржавы Ватыкан, распачнецца на Плошчы Святога Пятра а 10.30 па цэнтральнаеўрапейскім часе. Пасля Імшы будзе ўдзелена благаслаўленне “Urbi et Orbi”, але дэталі гэтага абраду пакуль не паведамляюцца.
У Ватыкане паведамілі таксама, што Імшу Пасхальнай Вігіліі, якая адбудзецца ў ватыканскай базіліцы ўвечары ў Вялікую суботу, 19 красавіка, узначаліць кардынал Джавані Батыста Рэ, дэкан Калегіі кардыналаў, а Імшу Вячэры Пана ў Вялікі чацвер, 17 красавіка – кардынал Маўра Гамбэці, архіпрэзбітэр Базілікі Святога Пятра.
Раней паведамлялася, што Святую Імшу Хрызму ў Базіліцы Святога Пятра раніцай у Вялікі чацвер, будзе цэлебраваць кардынал Даменіка Кальканьё, старшыня-эмерыт Адміністрацыі маёмасці Апостальскай Сталіцы.
Літургію Мукі Пана, якая адбудзецца ў Базыліцы Святога Пятра ў Вялікую пятніцу, 18 красавіка, узначаліць кардынал Клаўдыё Гуджэроці, прэфект Дыкастэрыі па справах Усходніх Цэркваў, а традыцыйнае набажэнства Крыжовага шляху ў рымскім Калізеі – кардынал Бальдасарэ Рэйна, Папскі вікарый для Рымскай дыяцэзіі.
Пра прысутнасць Святога Айца на набажэнствах Вялікага тыдня пакуль не паведамляецца.
