Святы Пасад: пераносіцца кананізацыя Карла Акуціса
Аляксандр Панчанка - Vatican News
Падзея была запланавана на 27 красавіка 2025 года, ІІ Велікодную нядзелю або Нядзелю Божай Міласэрнасці. Яна павінна была стаць кульмінацыяй Юбілею падлеткаў – рымскай сустрэчы тысяч юнакоў і дзяўчат з усяго свету з нагоды Святога 2025 года.
Юбілейная пілігрымка моладзі адбудзецца, але ў яе праграму былі ўнесены змены: акрамя ўрачыстага абвяшчэння святым благаслаўлёнага Карла Акуціса, быў адменены святочны канцэрт. Новая дата кананізацыі пакуль не паведамляецца
Увечары 21 красавіка ў рымскай Базіліцы Святога Яна на Латэране – катэдральным касцёле Рыма – адбудзецца святая Імша ў інтэнцыі спачылага Пантыфіка. Літургію ўзначаліць кардынал Бальдасарэ Рэйна, Папскі вікарый для Рымскай дыяцэзіі.
Жалобу ў сувязі са смерцю Святога Айца абвясцілі ўлады Вечнага горада. Былі адменены ўсе публічныя мерапрыемствы, запланаваныя на бліжэйшыя дні з нагоды святкавання 2778-годдзя з дня заснавання Рыма. У гэты час не будуць праводзіцца і футбольныя матчы італьянскага чэмпіянату.
