Галахер: Бог з любоўю прымае тых, хто вяртаецца з "далёкага краю"
Марыя Валодзіна – Vatican News
Арцыбіскуп Галахер падкрэсліў, што галоўнай дзеючай асобай прыпавесці з’яўляецца не столькі марнатраўны сын, колькі міласэрны айцец, які ўвасабляе бясконцую любоў Бога. “Любоў Айца настолькі моцная і вялікая, што не імкнецца валодаць іншым, а гатова адпусціць яго”, - патлумачыў ён. Айцец не патрабуе нічога, але цярпліва чакае. Гэта любоў, якая даруе і прымае тых, хто вяртаецца дадому. Яна не ратуе нас і не ўтрымлівае ад пахода ў "далёкі край", аднак Айцец заўсёды даруе і прымае нас пасля перажытага там досведу. "Гэта добрая навіна для тых з нас, хто адпраўляецца ў далёкі край, а рана ці позна ўсе мы трапляем туды", - адзначыў іерарх.
Прывітанне ад Папы Францішка
Сакратар па сувязях з дзяржавамі і міжнароднымі арганізацыямі прывітаў усіх удзельнікаў набажэнства ад імя Францішка, запэўніўшы ў яго духоўнай блізкасці і малітве. Святы Айцец удзячны ўсім за малітвы, якія ўзносіліся за яго падчас хваробы і шпіталізацыі, а таксама і цяпер, у перыяд выздараўлення, - зазначыў арцыбіскуп Галахер.
Этапы візіту
У пятніцу, 28 сакавіка 2025 года, прадстаўнік Святога Пасада сустрэўся з міністрам замежных спраў і знешняга гандлю Венгрыі Петэрам Сіяртам. Затым ён выступіў на штогадовай канферэнцыі венгерскіх паслоў і прыняў удзел у цырымоніі, прысвечанай 60-й гадавіне з дня смерці Праведніка народаў свету, арцыбіскупа Анджэла Роты, Апостальскага нунцыя ў Будапешце ў перыяд з 1930 па 1945 год.
Пасля гэтага ватыканскі дыпламат сустрэўся з кардыналам Пэтэрам Эрдо, арцыбіскупам Андрашам Верэсам, старшынёй Канферэнцыі Біскупаў Венгрыі, чатырма арцыбіскупамі і грэка-каталіцкім мітрапалітам. У суботу, 29 сакавіка, у Апостальскай нунцыятуры ў Будапешце ён правёў сустрэчу з групай акрэдытаваных у Венгрыі паслоў.
