Кардынал Спэнглер: Папа – аўтарытэт не толькі для католікаў
Ян Глінскі
Арцыбіскуп Порту-Алегры, а з 2023 года і старшыня біскупскай канферэнцыі Бразіліі нагадаў, што “Папа Францішак – не толькі кіраўнік Каталіцкага Касцёла, але і голас, які чуюць урады і іншыя суб’екты”.
Іерарх запэўніў, што біскупы Лацінскай Амерыкі і Карыбскага басейна разам моляцца аб здароўі Пантыфіка, каб той і далей мог кіраваць шляхамі Касцёла і рэалізоўваць прынцыпы Евангелля.
Удзельнікі сустрэчы ў Багаце акрамя разважання над пытаннем сінадальнасці ўздымалі таксама тэму кліматычнага крызісу. “У сувязі з паглыбленнем кліматычных трагедый ва ўсім свеце, ахова клімату з’яўляецца выклікам, які датычыць усіх католікаў і які я б таксама ахарактарызаваў як прынцып веры”, – адзначыў кардынал Спэнглер.
Як паінфармавалі ў Апостальскай Сталіцы раніцай 27 лютага 2025 года, агульны прагноз адносна стану Пантыфіка застаецца асцярожным. Тым не менш, лёгкая нырачная недастатковасць, адзначаная ў апошнія дні, знікла. Камп’ютарная тамаграфія грудной клеткі паказала нармальнае развіццё запаленчай карціны лёгкіх. Упершыню за тыдзень стан Папы перастаў быць “крытычным”.
Шпіталізацыя са складанай інфекцыяй дыхальных шляхоў і лёгкіх з’яўляецца самай працяглай за яго амаль дванаццацігадовы пантыфікат.
