Абвешчаны склад журы “Прэміі Заіда за чалавечае братэрства”
Vatican News
У Абу-Дабі 7 ліпеня 2025 года абвешчаны склад новай камісіі журы "Прэміі Заіда за чалавечае братэрства", якая прысуджаецца асобам і арганізацыям за іх унёсак у развіццё чалавечага братэрства і спрыянне мірнаму суіснаванню народаў.
Прэмія як платформа натхнення для свету
Сярод шасці членаў міжнароднай камісіі – выбітныя дзеячы з розных кантынентаў і сфер дзейнасці: Кэтрын Расэл з ЮНІСЕФ, Шарль Мішэль, які раней узначальваў Еўрапейскі савет і ўрад Бельгіі; Муса Факі Махамат, дасведчаны дыпламат з Чада і былы старшыня Камісіі Афрыканскага Саюза; Саіда Мірзіёева, кіраўніца адміністрацыі прэзідэнта Узбекістана; кардынал Жазэ Таленціна дэ Мендонса, кіраўнік Дыкастэрыі па культуры і адукацыі; а таксама суддзя Мухамед Абдэльсалам, які займае пасаду генеральнага сакратара самой Прэміі.
Сёлетнія члены журы паходзяць з Афрыкі, Азіі, Еўропы, Блізкага Усходу і Амерыкі, і прадстаўляюць розныя сферы, такія як гуманітарная дапамога дзецям, дыпламатыя, культура, адукацыя, СМІ і права.
Спадчына міру і братэрства
Кардынал Жазэ Таленціна дэ Мендонса, каментуючы сваё прызначэнне, не хаваў эмоцый і падкрэсліў, што бачыць у гэтым не проста фармальную пасаду, але сапраўдную місію: "Я прымаю гэтую адказнасць, давераную мне Папам Францішкам. (...) У духу служэння і паслухмянасці Папу Льву XIV я з нецярпеннем чакаю вывучэння заявак і знаёмства з многімі людзьмі, якія мяняюць свет да лепшага."
“Прэмія Заіда” была заснавана ў 2019 годзе пасля гістарычнай сустрэчы ў Абу-Дабі паміж Папам Францішкам і Вялікім Імамам Аль-Азхара Ахмедам Эль-Таебам, падчас якой быў падпісаны "Дакумент аб чалавечым братэрстве".
Узнагарода для герояў чалавечнасці ва ўсім свеце
З моманту заснавання прэміі яе атрымалі 16 лаўрэатаў з 15 краін, сярод якіх Папа Францішак і Вялікі Імам Аль-Азхара Ахмед Эль-Таеб (ганаровыя лаўрэаты), генеральны сакратар ААН Антоніу Гутэрыш, каралеўская пара Іарданіі – Кароль Абдала II і Каралева Ранія, а таксама шэраг арганізацый і дзеячаў, якія працуюць на карысць міру і чалавечага братэрства.
Тэрмін падачы заявак на "Прэмію Заіда 2026" вызначаны да 1 кастрычніка 2025 года. Гэта можна зрабіць праз афіцыйны сайт Прэміі: .
"Прэмія Заіда”, узнагарода ў памеры 1 мільён долараў, з'яўляецца не толькі прызнаннем дасягненняў, але і сродкам для далейшага развіцця ініцыятыў, накіраваных на ўмацаванне чалавечага братэрства і мірнага суіснавання.
