“Caritas” далучыўся да заклікаў Папы спыніць агонь у Газе
Аляксандр Амяльчэня - Vatican News
Федэрацыя выступіла з заклікам да "поўнай павагі да міжнароднага права, міжнароднага гуманітарнага права і міжнародных правоў чалавека" ў сувязі з ізраільскай атакай на парафію Святой Сям'і ў Газе. Арганізацыя выказала падтрымку Льву XIV "у яго чарговым закліку да міжнароднай супольнасці аб неадкладным спыненні агню".
У камюніке гучыць заклік да павагі і абароны месцаў рэлігійнага культу і гуманітарных прытулкаў, забеспячэння неабмежаванага доступу да гуманітарнай дапамогі, бяспечных калідораў і медыцынскай дапамогі для цывільнага насельніцтва.
Таксама ў арганізацыі патрабуюць спынення ўсіх нападаў на цывільнае насельніцтва, асабліва на асоб, якія шукаюць прытулку ў касцёлах, іншых месцах рэлігійнага культу і выразна пазначаных гуманітарных зонах.
Аліcтэр Датан, генеральны сакратар “Caritas Internationalis”, выказаў абурэнне ізраільскай атакай. "Мы знішчаны гэтым апошнім нападам на людзей, якія проста спрабавалі выжыць і ўкрыліся ў касцёле", - заявіў ён. "Іх смерць – балючы напамін аб жахлівых умовах, у якіх жывуць цывільныя і медыцынскі персанал у стане аблогі. Мы аплакваем ахвяры і заклікаем усе бакі канфлікту паважаць святасць жыцця і прасторы, якія яго абараняюць".
17 ліпеня 2025 года раніцай Касцёл Святой Сям'і ў Газе стаў мэтай ваеннай аперацыі, у выніку якой загінулі некалькі чалавек і многія атрымалі раненні. Гэтая падзея выклікала шырокі міжнародны рэзананс і заклікі да неадкладнага спынення ваенных дзеянняў.
