Геапалітычны часопіс “Limes” прысвяціў выпуск Льву XIV
Марыя Валодзіна - Vatican News
У прэзентацыі прынялі ўдзел галоўны рэдактар “Limes” Луча Карачала, Папскі вікарый для Рымскай дыяцэзіі, кардынал Бальдасарэ Рэйна, і вядомы картограф Лаура Каналі. Сустрэчу вёў журналіст П'ера Ск'явацы.
Асаблівую ўвагу ўдзельнікі надалі першаму пасланню Пантыфіка – закліку да міру, які, нягледзячы на сваю знешнюю прастату, быў названы сапраўдным “рэвалюцыйным актам” у свеце, дзе войны распальваюцца адна за адной.
Кардынал Рэйна адзначыў, што Папа Леў XIV з'яўляецца надзвычай своечасовай постаццю для сучаснага Касцёла. Яго еўрапейскія карані, добрае разуменне амерыканскай рэчаіснасці, глыбокая сувязь з Лацінскай Амерыкай і багаты досвед служэння супольнасці аўгустынцаў па пяці кантынентах даюць яму магчымасць быць чалавекам дыялогу, адкрытым на ўвесь свет. Яго абранне – гэта "дар Провіду", - лічыць іерарх.
На думку кардынала Рэйны, Пантыфік добра разумее патрэбу ў аднаўленні ролі Касцёла ў Еўропе: не гегемоніі еўрапейскага Касцёла, а прысутнасці, якая дазваляла б распаўсюджваць Евангелле з Еўропы па ўсім свеце. Вялікім плюсам з’яўляецца і яго досвед працы ў Рымскай курыі, дзе ён быў прэфектам Дыкастэрыі па справах біскупаў у перыяд рэформы, ініцыяванай Францішкам. Асаблівае значэнне мае і ягоная аўгустынская духоўнасць: імкненне да адзінства, цэнтральнасць Хрыста, братэрства.
Сярод асноўных выклікаў пантыфікату вікарый вылучыў: новыя шляхі евангелізацыі, крызіс пакліканняў, працяг рэформы Рымскай курыі з улікам таго, што на агульных кангрэгацыях, якія папярэднічалі канклаву, паўстала неабходнасць у Касцёле з больш калегіяльнай формай кіравання, а таксама тэма перыферый, у тым ліку экзістэнцыяльных, і спадчына Папы Францішка.
Галоўны рэдактар “Limes” Луча Карачала нагадаў, што Святы Пасад застаецца важным геапалітычным суб’ектам, які аднак перажывае крызіс і павінен занова адкрыць для сябе сэнс супольнасці. У журналіста склалася ўражанне, што Леў XIV лічыць "краіну свайго нараджэння непазбежнай біяграфічнай і культурнай спасылкай" і што ў пэўным сэнсе працягвае лінію Францішка, які лічыў, што Касцёл патрабуе ўзварушэння, але прапануе больш стрыманую мадэль.
Карачала адзначыў, што як "амерыканскі Папа", Леў XIV будзе ацэньвацца па адносінам з дзяржавамі, і менавіта таму ён адразу ж заклікаў да міру. Гэта можа здавацца банальнасцю, відавочнасцю, але мае вялікі сэнс у свеце, перанасычаным рыторыкай вайны.
