Брусельскі даклад “Caritas”: мільёны еўрапейцаў жывуць у беднасці
Аляксандр Амяльчэня - Vatican News
Маладыя людзі 18-25 гадоў, мігранты і бяздомныя часта не могуць атрымаць мінімальны даход з прычыны немагчымасці выканаць фармальныя патрабаванні: адсутнасць прапіскі ці нерэгулярныя ўзносы. Бюракратыя і лічбавыя бар'еры прымушаюць многіх адмаўляцца ад спроб атрымаць дапамогу.
Еўропа патрабуе сістэмных змен
"Праграмы сацыяльнай дапамогі павінны даваць людзям магчымасць жыць годна і поўнасцю ўдзельнічаць у жыцці грамадства", - заявіла Марыя Німан, генеральны сакратар “Caritas Europa”, каментуючы даследаванне.
Даклад набывае асаблівую важнасць падчас распрацоўкі Еўрапейскай камісіяй першай агульнай стратэгіі барацьбы з беднасцю. Caritas заклікае ЕС да канкрэтных крокаў, каб мінімальны даход дасягнуў 75 працэнтаў нацыянальнага парога беднасці.
Свабода перамяшчэння без забеспячэння базавых правоў – недастатковая
Аўтары дакладу выступаюць за рэформу дырэктывы ЕС пра свабоднае перамяшчэнне грамадзян. Яны патрабуюць гарантаваць еўрапейцам у складаных сітуацыях доступ да прытулкаў, экстраннай медыцынскай дапамогі, адукацыі для дзяцей і курсаў, якія дапамагаюць у пошуку працы.
Дабрачынныя арганізацыі вымушаны запаўняць прабелы дзяржаўнай падтрымкі
Даследаванне выявіла, што ў большасці еўрапейскіх краін узровень сацыяльнай дапамогі не дасягае нават паловы нацыянальнага парога беднасці. Гэта прымушае нацыянальныя аддзяленні “Caritas” у розных краінах браць на сябе ўсё большую адказнасць за падтрымку найбольш уразлівых груп насельніцтва: бяздомных, мігрантаў і сем'яў з нізкімі даходамі.
"Барацьба з беднасцю павінна стаць прыярытэтам для ўсёй Еўропы, а не толькі для асобных дзяржаў," - падкрэсліваецца ў дакладзе. Аўтары даследавання таксама адзначаюць, што эканамічныя крызісы і інфляцыя толькі пагаршаюць сітуацыю і патрабуюць сістэмных рашэнняў на агульнаеўрапейскім узроўні.
