Тэлефонная размова Пантыфіка і прэм'ер-міністра Італіі
Аляксандр Амяльчэня - Vatican News
Інфармацыя пра тэлефонную размову паміж Львом XIV і Джорджыяй Мелоні была апублікавана ў афіцыйнай заяве Палаца Кіджы і пацверджана Залай Друку Святога Пасада.
Непарыўная сувязь паміж Італіяй і Намеснікам Хрыста
Падчас размовы Мелоні паўторна выказала Папу "асабістыя віншаванні і віншаванні ад імя італьянскага ўрада з нагоды выбрання на Пятроў Пасад і падкрэсліла непарыўную сувязь, якая аб'ядноўвае Італію з Намеснікам Хрыста", як адзначаецца ў паведамленні.
"Італія цэніць і падтрымлівае намаганні Святога Пасада на карысць міру і спынення канфліктаў ва ўсіх крызісных рэгіёнах, дзе зброя замяніла дыялог і перамовы", - гаворыцца ў паведамленні Палаца Кіджы.
Этычнае развіццё штучнага інтэлекту
Італьянскі прэм'ер таксама пацвердзіла "гатоўнасць Італіі працягваць працаваць разам са Святым Пасадам дзеля этычнага развіцця і выкарыстання штучнага інтэлекту на карысць чалавека".
Гэтая задача, як адзначаецца ў паведамленні, "была цэнтральнай падчас старшынства Італіі ў G7, і яе важнасць – для абароны годнасці чалавека, справядлівасці і працы – Папа Леў XIV падкрэсліў падчас сустрэчы з кардыналамі 10 мая 2025 года".
Варта нагадаць, што падчас сустрэчы з кардыналамі новаабраны Пантыфік патлумачыў выбар свайго імя, спаслаўшыся на Льва XIII, які ў энцыкліцы “Rerum Novarum” закрануў сацыяльныя пытанні, што застаюцца актуальнымі і сёння, асабліва ў кантэксце новых тэхналогій і іх уплыву на грамадства.
