Рост цікавасці да ордэна аўгустынцаў – эфект абрання новага Папы
Ян Глінскі
Генеральны настаяцель Ордэна Святога Аўгустына назваў гэты феномен эфектам новаабранага Папы, якім стаў аўгустынец кардынал Роберт Прэвост. У размове з агенцтвам SIR айцец Алехандра Мараль выказаў жаданне, каб дадзены выклік стаў для ордэна стымулам. “Гэта час, які можа прынесці станоўчыя плады для ўсіх, не толькі для нас”, – дадаў аўгустынец.
Айцец Алехандра Мараль перакананы, што менавіта ў такім Пантыфіку мае патрэбу сучасны Касцёл і свет. “Леў XIV разважлівы, ураўнаважаны, здольны слухаць і назіраць – адпаведная асоба для гэтага часу”, – падкрэсліў генеральны настаяцель, а таксама нагадаў, што імя, якое выбраў сабе кардынал Прэвост, “указвае на выразны душпастырскі кірунак: адважна весці Касцёл праз эпахальныя змены, якія мы назіраем, пачынаючы ад тэхналагічнай рэвалюцыі”.
Па словах генеральнага настаяцеля Ордэна Святога Аўгустына, Леў XIV – гэта “Папа, прысутны ў свеце: ён бачыць змены, якія адбываюцца, і ведае, што на знакі часу трэба рэагаваць з евангельскай адказнасцю”. “Гэта пантыфікат, скіраваны не ў мінулае, а ў будучыню”, – сцвердзіў айцец Мараль.
