Адкрыццё Юбілею моладзі: у гэтыя дні Рым у вашых руках!
Марыя Валодзіна - Vatican News
У гэты вечар на ватыканскай плошчы і прылеглых вуліцах сабралося каля 120 тысяч маладых пілігрымаў. Панаваў дух сапраўднага свята: гучала музыка, луналі сцягі, хлопцы і дзяўчаты ў каляровых футболках з энтузіязмам спявалі гімн Юбілею.
“Дарагія сябры! Вітаю вас ад імя Папы Льва XIV!” - звярнуўся да моладзі арцыбіскуп Фізікела, адказны за арганізацыю Юбілею.
“Дзякуй за тое, што адгукнуліся на запрашэнне Папы прыняць удзел у гэтым Юбілеі, прысвечаным вам і надзеі, якую кожны носіць у сэрцы. Вы прыехалі з розных куткоў свету. Сярод вас ёсць сябры, якія паходзяць з рэгіёнаў, ахопленых вайной: з Украіны, Палесціны. Няхай вашыя братэрскія абдымкі, якія яднаюць нас у адно цела, дасягнуць кожнага. Дайце ім адчуць цяпло вашага сяброўства”, - заклікаў іерарх.
“Многія з вас пераадолелі шмат цяжкасцяў, каб быць сёння тут, у Рыме. Пан не расчаруе вас. Ён ідзе вам насустрач, а вы заставайцеся пільнымі, каб распазнаць Яго прысутнасць. Напоўніце гэтыя дні радасцю і духоўнасцю, знаходзячы новых сяброў, і перш за ўсё, сузірайце Рым і яго шматлікія шэдэўры – адлюстраванне веры, якая натхніла гэтую прыгажосць. Мы тут, каб перадаць веру і ўсвядоміць вялікую ролю Езуса Хрыста ў нашым жыцці. Давайце адгукнёмся з энтузіязмам: у гэтыя дні Рым і ўсё, што ён сімвалізуе, у вашых руках!” - сцвердзіў арцыбіскуп Фізікела, запрашаючы ўсіх 2-3 жніўня ў “Тор Вергату” на вігілію і на святую Імшу з Львом XIV. У нядзелю там чакаецца каля мільёна чалавек.
Нечаканай кульмінацыяй свята стала з'яўленне Папы Льва XIV, які пасля Імшы прыехаў на плошчу, каб асабіста прывітаць удзельнікаў Юбілею. Святы Айцец праехаў па плошчы і па Віа-дэла-Канчыліяцыёнэ на папамабілі, а затым звярнуўся да юнакоў і дзяўчат з кароткім прывітаннем на некалькіх мовах. “Езус кажа нам: вы – соль зямлі, вы – святло свету! І сёння вашы галасы, ваш энтузіязм, вашы воклічы – усё гэта дзеля Езуса Хрыста. Іх будуць чуць ва ўсіх частках свету!” – сказаў Пантыфік, заклікаючы моладзь несці ў свет пасланне надзеі.
