Папа выказаў духоўную блізкасць удзельнікам пілігрымкі ў Ларэта
Аляксандр Панчанка - Vatican News
Леў XIV запэўніў у духоўнай блізкасці ўдзельнікаў 47-й начной пешай пілігрымкі з Мачэраты ў Папскі санктуарый Святога Дома ў Ларэта. Яна распачалася ўвечары 16 чэрвеня 2025 года і завяршылася на світанку наступнага дня. 28-кіламетровы шлях, з малітвай, спевамі і сведчаннямі, пераадолелі каля 70 тысяч пілігрымаў.
“Святы Айцец скіроўвае сваё благаслаўляючае прывітанне, запэўніваючы ў духоўнай блізкасці ўсіх удзельнікаў”, - гаворыцца ў папскай тэлеграме, адпраўленай за подпісам кардынала-дзяржсакратара П’етра Параліна на імя мансеньёра Джанкарла Вечэрыка, біскупа-эмерыта дыяцэзіі Фабрыяна-Матэліка, па ініцыятыве якога ў 1978 годзе адбылася першая пілігрымка з Мачэраты ў Ларэта.
“Леў XIV, заклікаючы вучыцца пакорнаму і ціхаму стылю Панны Марыі, якая ва ўсіх жыццёвых абставінах з даверам скіроўвала позірк на свайго Сына Езуса, выказвае надзею, што гэты момант малітвы абудзіць у кожным новы запал на шляху веры, каб стаць радаснымі і сапраўднымі сведкамі Евангелля”, - падкрэсліваецца ў пасланні, якое падчас святой Імшы на пачатак пілігрымкі зачытаў кардынал Марчэла Сэмерара, прэфект Дыкастэрыі па справах кананізацыі.
