Леў XIV: дзяленне хлеба памнажае надзею
Аляксандр Амяльчэня - Vatican News
"Дарагія браты і сёстры, добра быць з Езусам. Евангелле, якое мы толькі што пачулі, сведчыць пра гэта, распавядаючы, што натоўпы заставаліся з Ім гадзінамі, а Ён гаварыў пра Божае Валадарства і аздараўляў хворых (пар. Лк 9, 11). Спагада Езуса да пакутуючых выяўляе любячую блізкасць Бога, які прыходзіць у свет, каб збавіць нас", - сказаў Папа ў сваёй гаміліі.
Голад народа і заход сонца
Святы Айцец разважаў над евангельскай сцэнай памнажэння хлябоў, адзначаючы, што голад людзей і захад сонца з'яўляюцца знакамі абмежаванняў, якія навісаюць над светам, над кожным стварэннем: "Дзень заканчваецца, як і жыццё людзей. Менавіта ў гэты час, у час беднасці і ценяў, Езус застаецца сярод нас".
"Менавіта калі сонца заходзіць і голад расце, у той час як самі апосталы просяць адпусціць людзей, Хрыстус здзіўляе нас сваёй міласэрнасцю. Ён мае спагаду да галоднага народа і запрашае сваіх вучняў паклапаціцца пра іх: голад – гэта не патрэба, якая не мае дачынення да абвяшчэння Валадарства і сведчання збаўлення", - адзначыў Папа.
Логіка, якая ратуе галодны народ
"На заклік голаду Ён адказвае знакам дзялення: узнімае вочы, прамаўляе бласлаўленне, ломіць хлеб і дае паесці ўсім прысутным", - адзначыў Пантыфік. "Жэсты Пана сведчаць не пра складаны магічны рытуал, але пра ўдзячнасць Айцу, сыноўскую малітву Хрыста і братэрскую еднасць, якую падтрымлівае Дух Святы ".
Каб памножыць хлябы і рыбу, Езус дзеліць тое, што ёсць: "Менавіта так іх хапае для ўсіх, нават, застаецца ў лішку. Пасля таго, як паелі – і паелі ўдосталь – яны сабралі дванаццаць кашоў" (пар. Лк 9, 17).
Сёння на месцы натоўпаў знаходзяцца цэлыя народы
"Гэта логіка, якая ратуе галодны народ: Езус дзейнічае ў стылі Бога, вучачы рабіць тое ж самае", - падкрэсліў Леў XIV.
"Сёння на месцы натоўпаў, згаданых у Евангеллі, знаходзяцца цэлыя народы, прыніжаныя чужой прагнасцю нават больш, чым уласным голадам. Перад галечай многіх, накапленне нямногіх з'яўляецца знакам абыякавай пыхі, якая прыносіць боль і несправядлівасць", - адзначыў Святы Айцец.
"Замест таго, каб дзяліцца, раскоша марнуе плёны зямлі і працы чалавека. Асабліва ў гэты юбілейны год прыклад Пана застаецца для нас неадкладным крытэрыем дзеяння і служэння: дзяліцца хлебам, каб памножыць надзею, абвяшчае надыход Божага Валадарства", - дадаў ён.
Хрыстус – адказ Бога на голад чалавека
"Выратоўваючы натоўпы ад голаду, Езус абвяшчае, што выратуе ўсіх ад смерці. Гэта таямніца веры, якую мы святкуем у сакрамэнце Эўхарыстыі", - сказаў Папа. "Як голад з'яўляецца знакам нашай радыкальнай беднасці жыцця, так ламанне хлеба з'яўляецца знакам боскага дару збаўлення".
"Дарагія сябры, Хрыстус – гэта адказ Бога на голад чалавека, бо Яго цела – хлеб вечнага жыцця: бярыце і ешце ўсе!", - заклікаў Папа.
Эўхарыстыя робіць нас Целам Пана
"Еўхарыстыя – гэта сапраўдная, рэальная і істотная прысутнасць Збаўцы, які ператварае хлеб у сябе, каб ператварыць нас у Яго. Жывое і жыццядайнае, Цела Пана робіць нас, то бок сам Касцёл, целам Пана", - падкрэсліў Святы Айцец.
Ён нагадаў, што, згодна з вучэннем Другога Ватыканскага Сабора, "сакрамэнтам эўхарыстычнага хлеба паказваецца і ажыццяўляецца еднасць вернікаў, якія складаюць адно цела ў Хрысце. Усе людзі пакліканы да гэтага аб'яднання з Хрыстом, Які ёсць святлом свету: ад Яго мы прыходзім, праз Яго мы жывём, да Яго мы скіраваны".
Працэсія – знак нашага шляху з Хрыстом
Завяршаючы гамілію, Папа адзначыў, што працэсія ва ўрачыстасць Найсвяцейшага Цела і Крыві Хрыста з'яўляецца знакам гэтага шляху з Хрыстом.
"Разам, пастыры і статак, мы жывімся Найсвяцейшым Сакрамэнтам, сузіраем Яго і нясем Яго па вуліцах. Робячы гэта, мы прапануем Яго позірку, сумленню, сэрцу людзей.
Мы нясём Эўхарыстыю, каб дакрануцца да сэрцаў усіх людзей: вернікаў – каб умацаваць іх веру, а тых, хто не верыць – каб заахвоціць задумацца над духоўным голадам, які адчувае кожны чалавек, і над Хлебам, які сапраўды можа наталіць гэты голад", - падкрэсліў Святы Айцец.
"Падмацаваныя ежай, якую дае нам Бог, мы нясём Езуса ў сэрца ўсіх, бо Езус уцягвае ўсіх у справу збаўлення, запрашаючы кожнага ўдзельнічаць у Яго вячэры. Шчаслівыя запрошаныя, якія становяцца сведкамі гэтай любові!", - заключыў Папа Леў XIV.
