Святы Айцец прыняў прэзідэнтаў Перу і Украіны
Аляксандр Панчанка - Vatican News
Прэзідэнт Перу Дзіна Эрсілія Балуартэ Сегара напісала ў сацыяльнай сетцы “Х”, што мела магчымасць запэўніць Папу ў блізкасці перуанскага народа. Яна згадала Льва XІV як “Божага слугу, які прысвяціў шмат гадоў місіі евангелізацыі і служэння самым патрабуючым у краіне”.
Прэзідэнт Украіны Уладзімір Зяленскі прысутнічаў на аўдыенцыі ў Святога Айца разам са сваёй жонкай Аленай Зяленскай. У сацыяльных сетках украінскі лідар падзякаваў Папу за словы пра Украіну, прамоўленыя ім перад малітвай “Уладарка Неба”, асабліва за “патрэбу ў справядлівым міры”, бо “кожная краіна заслугоўвае жыцця ў міры і бяспецы”.
“Для мільёнаў людзей у свеце Пантыфік з’яўляецца сімвалам надзеі на мір. Аўтарытэт і голас Святога Пасаду могуць адыграць важную ролю ў завяршэнні гэтай вайны”, - напісаў Зяленскі. Ён падзякаваў “Ватыкану за гатоўнасць стаць пляцоўкай для прамых перамоў паміж Украінай і Расіяй”, падкрэсліўшы, што “мы гатовыя да дыялогу ў любым фармаце дзеля рэальных вынікаў”.
“Дзякуем за падтрымку Украіны і за выразны голас у абарону справядлівага і трывалага міру”, - адзначыў прэзідэнт Украіны.
