Першая афіцыйная сустрэча Льва XIV – з вікарыем Рымскай дыяцэзіі
Аляксандр Амяльчэня - Vatican News
Выбар кардынала-вікарыя Рымскай дыяцэзіі ў якасці першага афіцыйнага госця мае важнае сімвалічнае значэнне. Гэта падкрэслівае ролю Папы як Біскупа Рыма – пасады, з якой гістарычна вынікае яго прымат у Каталіцкім Касцёле.
Кардынал Рэйна, які быў прызначаны на пасаду яшчэ пры папярэднім пантыфікаце, у якасці вікарыя выконвае ад імя Папы штодзённае кіраванне Рымскай дыяцэзіяй. Яго роля заключаецца ў каардынацыі пастырскай дзейнасці ў 336 парафіях дыяцэзіі, дзе пражывае больш за 2 мільёна католікаў.
Падрабязнасці сустрэчы не агалошваюцца, але традыцыйна падчас такіх аўдыенцый біскупы прадстаўляюць Папу інфармацыю пра бягучы стан дыяцэзіі і абмяркоўваюць з ім асноўныя напрамкі душпастырскай дзейнасці.
Па традыцыі, у першыя месяцы пантыфікату Пантыфікі здзяйсняюць афіцыйнае наведванне Базілікі Святога Яна на Латэране, якая з'яўляецца катэдрай Біскупа Рыма.
