Пантыфік накіраваў пасланне галоўнаму рабіну Рыма
Аляксандр Амяльчэня - Vatican News
Пасля свайго абрання Леў XIV звярнуўся да яўрэйскай супольнасці Рыма з выразнай прыхільнасцю і жаданнем умацоўваць сувязі. Галоўны рабін Рыкарда Дзі Сэньі атрымаў асабістае пасланне ад Папы, у якім той паведаміў яму аб сваім абранні новым Біскупам Рыма.
Працягваць дыялог у духу “Nostra aetate”
У сваім пасланні Пантыфік выказаў моцную прыхільнасць да "працягвання і ўмацавання дыялогу і супрацоўніцтва Касцёла з яўрэйскім народам у духу дэкларацыі “Nostra aetate” Другога Ватыканскага Сабора".
Галоўны рабін Рыма, які плануе прысутнічаць на ўрачыстай інаўгурацыі пантыфікату, прыняў "з задавальненнем і ўдзячнасцю словы, скіраваныя да яго новым Папам", як паведамляе яўрэйская супольнасць Рыма.
Гістарычная пераемнасць у адносінах з яўрэйскім народам
Гэты жэст Папы Льва XIV працягвае традыцыю яго папярэднікаў, якія надавалі асаблівую ўвагу адносінам з яўрэйскай супольнасцю.
Дэкларацыя “Nostra aetate”, прынятая 28 кастрычніка 1965 года падчас Другога Ватыканскага Сабора, стала пераломным момантам у адносінах паміж Касцёлам і яўрэйскім народам, адкрыўшы новую эру ўзаемнай павагі і дыялогу.
