Папа ў шпіталі: два эпізоды вострай дыхальнай недастатковасці
У Францішка адбыліся два эпізоды вострай дыхальнай недастатковасці, гаворыцца ў вячэрнім медыцынскім бюлетэні, апублікаваным 3 сакавіка 2025 года Залай Друку Апостальскай Сталіцы.
Аляксандр Панчанка - Vatican News
“На працягу сённяшняга дня Святы Айцец перанёс два эпізоды вострай дыхальнай недастатковасці, выкліканыя значным назапашваннем эндабранхіяльнай слізі і наступным бронхаспазмам. У сувязі з гэтым былі праведзены дзве бронхаскапіі з неабходнасцю адсмоктвання вялікай колькасці сакрэту”, - паведамілі ў Ватыкане.
Адзначаецца таксама, што “ў другой палове дня была ўзноўлена неінвазіўная штучная вентыляцыя лёгкіх”. Святы Айцец увесь час заставаўся ў прытомнасці, арыентаваўся і супрацоўнічаў з медыцынскім персаналам. Прагноз застаецца асцярожным, - падкрэсліваецца ў бюлетэні.
88-гадовы Пантыфік шпіталізаваны з двухбаковым запаленнем лёгкіх з 14 лютага 2025 года. Ён праходзіць лячэнне ў рымскай клініцы “Джэмэлі”.
03 сакавіка 2025, 19:30
