Францішак: прабачэнне – найлепшы лек для параненай сям’і
Аляксандр Панчанка - Vatican News
“Мы ўсе марым аб цудоўнай, дасканалай сям’і. Але ідэальных сем’яў не існуе. У любой сям’і ёсць свае праблемы, але ёсць і вялікія радасці. У сям’і кожны чалавек каштоўны, бо адрозніваецца ад іншых; кожны ўнікальны. Аднак адрозненні могуць таксама нараджаць канфлікты і пакідаць глыбокія раны”, - сказаў Папа.
Францішак падкрэсліў, што “найлепшы лек ад болю ў параненай сям’і – гэта прабачэнне”. “Прабачыць – значыць даць яшчэ адзін шанс. Пан увесь час робіць гэта для нас. Яго цярпенне бязмежнае: Ён прабачае нас, паднімае, дазваляе пачаць усё нанова”, - дадаў Пантыфік.
Па словах Святога Айца, “прабачэнне заўсёды абнаўляе сям’ю, дапамагае глядзець наперад з надзеяй. І нават, калі немагчымы “шчаслівы канец”, пра які марым, Божая ласка дае нам сілу, каб прабачаць і прыносіць мір, бо вызваляе ад смутку і, перш за ўсё, ад злапомнай крыўды”.
“Молімся, каб падзеленыя сем’і спазналі аздараўленчую моц прабачэння, і акрылі, што нават адрозненні могуць быць багаццем”, - агучыў Папа малітоўную інтэнцыю на сакавік.
