Папа павіншаваў кармелітак з 400-годдзем служэння ў Любліне
Аляксандр Панчанка - Vatican News
Святы Айцец выказаў глыбокую ўдзячнасць за чатыры стагоддзі малітвы, духоўнай падтрымкі і сведчання веры, якія кармеліткі нясуць не толькі жыхарам Любліншчыны, але і вернікам ва ўсім свеце. “Ваша прысутнасць у Люблінскай архідыяцэзіі – бясцэнны дар”, - цытуе Наступніка святога Пятра інфармацыйнае агенцтва KAI.
Пантыфік адзначыў, што кармеліткі з Любліна заснавалі новыя супольнасці ў Вільні (1638), Львове (1642), Варшаве (1648), Кіеве (1990), Харкаве (1995) і Бэтлееме (2000), што сведчыць пра паўсюдны характар кармеліцкай духоўнасці.
Францішак благаславіў манахінь і ўсіх вернікаў, звязаных з гэтым выключным месцам, пажадаўшы ім духоўнага росту і трываласці ў пакліканні і малітве.
Гісторыя прысутнасці кармелітак босых у Любліне пачалася 1 лістапада 1624 года, калі манахіні з Кракава пасяліліся пры двары Якуба Сабескага, бацькі будучага караля Яна III Сабескага. Падчас расійскага панавання іх кляштар быў скасаваны царскімі ўладамі. У 1966 годзе супольнасць адрадзілася, а ў 1985 годзе быў урачыста асвечаны іх новы кляштар у Дысе, дзе працягваецца 400-гадовая гісторыя.
