У Рыме адсвяткавалі ўрачыстасць Маці Божай Снежнай
Vatican News
5 жніўня 2025 года ў Рыме адбылося ўрачыстае святкаванне Маці Божай Снежнай. У гэты ж дзень адзначаецца гадавіна асвячэння аднаго з чатырох вялікіх Папскіх храмаў – Базілікі Санта-Марыя-Маджорэ. Вячэрнюю малітву ўзначаліў арцыбіскуп Эдгар Пэнья Пара, субстытут па агульных пытаннях Дзяржаўнага сакратарыяту.
Цуд снегападу
Іерарх нагадаў пра “цудоўную з’яву” – летні снегапад 5 жніўня 358 года, які, паводле старажытнай традыцыі, акрэсліў перыметр будучай святыні. Гэты дзіўны знак быў дадзены Багародзіцай у сне Папу Ліберыю, рымскаму патрыцыю Джавані і яго жонцы. Услед за гэтым сном адбылася незвычайная з’ява – снегапад у сярэдзіне лета. Ён і паклаў пачатак гісторыі базілікі, якая ўзвышаецца на адным з рымскіх пагоркаў – Эсквілінскім.
Гісторыя базілікі
Арцыбіскуп Пэнья Пара звярнуў увагу на значную ролю базілікі ў жыцці Касцёла. У V стагоддзі, пасля абвяшчэння Марыі Багародзіцай на Эфескім Саборы 431 года, Сікст ІІІ перабудаваў святыню, надаўшы ёй веліч і прысвоіўшы тытул Святой Марыі Вялікай – Санта-Марыя-Маджорэ.
Месца паломніцтва
На працягу стагоддзяў Базіліка Санта-Марыя-Маджорэ была і застаецца месцам марыйнай пабожнасці: пілігрымак, малітвы і адданасці. Вернікі прыходзяць сюды, “каб даверыць Маці Божай сваё існаванне, клопаты, радасці і пакуты, каб наблізіцца да сакрамэнтаў, асабліва споведзі, памаліцца перад абразом Salus Populi Romani, ушанаваць рэліквію Бэтлеемскіх яслей. Людзі знаходзяць тут супакой і вяртаюцца дадому “з абноўленай упэўненасцю і з добрымі намерамі", - падкрэсліў іерарх.
Асаблівае месца для Францішка
Арцыбіскуп Пэнья Пара прыгадаў словы з духоўнага тэстаменту Папы Францішка, у якім ён выказаў жаданне быць пахаваным у гэтай базіліцы – старажытным марыйным санктуарыі, куды ён “накіроўваўся для малітвы на пачатку і ў канцы кожнага апостальскага падарожжа, давяраючы свае намеры Беззаганнай Маці і дзякуючы Ёй за Яе лагодную і мацярынскую апеку”.
