У Рыме сустрэнуцца адказныя за пакліканні ў епіскапатах Еўропы
Марыя Валодзіна - Vatican News
Сустрэча арганізавана аддзелам па пытаннях пакліканняў Рады біскупскіх канферэнцый Еўропы (CCEE). Яна пройдзе 30 ліпеня 2025 года ў рымскай штаб-кватэры арганізацыі. Прадстаўнікі еўрапейскіх епіскапатаў, адказныя за пакліканні, абмяркуюць тэму “Стварэнне сувязяў на службе моладзі і душпастырства пакліканняў”.
Арцыбіскуп Джузэпэ Батуры, Генеральны сакратар Канферэнцыі Біскупаў Італіі (CEI) выступіць на тэму “Новыя пакаленні: мяжа міру”. Прафесар Патрыцыя Джунці, старшыня Фонду La Pira, разам з прадстаўнікамі Рады моладзі Міжземнамор’я правядзе прэзентацыю дзейнасці гэтай арганізацыі. Напрыканцы пасяджэння ўдзельнікам будзе прадстаўлены Маніфест моладзі Еўропы “Рэвалюцыя моладзевага духу”.
Увечары ўдзельнікі наведаюць Базіліку святога Аўгустына ў Рыме, у якой захоўваецца знакаміты твор Караваджа “Мадонна пілігрымаў”. Разам з аўгустынцамі яны прымуць удзел у святой Імшы, якую ўзначаліць арцыбіскуп Жазэ Мануэль Кардэйру Гарсія, кіраўнік аддзела па пытаннях пакліканняў Рады біскупскіх канферэнцый Еўропы.
