Каталіцкія ВНУ да моладзі: дзейнічаць дзеля ўстойлівага развіцця
Марыя Валодзіна - Vatican News
Справаздача пад назвай “Садзейнічанне глабальным зменам” (Driving Global Change) адрасуецца ўніверсітэтам, міжнародным арганізацыям, палітыкам, фондам, СМІ, а таксама грамадзянам, занятым у адукацыйнай і сацыяльнай сферах. Яна заклікае да разважанняў і актыўных дзеянняў.
У публікацыі прадстаўлены канкрэтныя ініцыятывы сямі партнёрскіх універсітэтаў, накіраваныя на ўстойлівае развіццё. Напрыклад, студэнты з Бостанскага каледжа распрацавалі ірыгацыйную сістэму для забеспячэння пітной вадой вёскі ў Эквадоры, Партугальскі каталіцкі ўніверсітэт стварае падкасты для барацьбы са стыгматызацыяй людзей з праблемамі псіхічнага здароўя, студэнты іспанскага каталіцкага ўніверсітэта даследуюць тэму лічбавага гуманізму, а Сафійскі ўніверсітэт у Японіі шукае ўстойлівую альтэрнатыву некантралюемай урбанізацыі.
Па словах старшыні SACRU, прафесара Аўстралійскага каталіцкага ўніверсітэта Златка Скрбіса, клопат пра агульны дом – гэта не толькі навуковая ці палітычная неабходнасць, але і маральны імператыў. Генеральны сакратар SACRU і дэкан факультэта сельскагаспадарчых, харчовых і экалагічных навук Каталіцкага ўніверсітэта Найсвяцейшага Сэрца П'ер Сандра Каканчэлі падкрэсліў, што "рашэнне глабальных праблем патрабуе не толькі ведаў і досведу прызнаных навукоўцаў, але і перспектыў маладых даследчыкаў і студэнтаў. (...) Устойлівае развіццё – гэта заклік да дзеяння, скіраваны да кожнага".
Міжнародная сетка каталіцкіх ВНУ
У склад Стратэгічнага альянсу каталіцкіх даследчых універсітэтаў (SACRU) ўваходзяць універсітэты з Аўстраліі, ЗША, Чылі, Бразіліі, Японіі, Партугаліі, Італіі і Іспаніі. Мэта альянсу – садзейнічаць глабальнаму супрацоўніцтву дзеля развіцця вышэйшай адукацыі і агульнага дабра. Сакратарыят арганізацыі месціцца ў Каталіцкім універсітэце Найсвяцейшага Сэрца ў Італіі.
Мэты ўстойлівага развіцця ААН
Мэты ўстойлівага развіцця – гэта 17 глабальных задач, прынятых ААН у 2015 годзе ў рамках Парадку дня на перыяд да 2030 года. Яны накіраваны на выкараненне беднасці, абарону планеты і забеспячэнне міру і дабрабыту для ўсіх. Кожная мэта датычыцца важнай праблемы, такой як змена клімату, гендарная роўнасць, доступ да адукацыі, аховы здароўя, годнай працы і сацыяльнай справядлівасці.
