Касцёл М’янмы ўдзячны Льву XIV за ўвагу да пакут мірных жыхароў
Марыя Валодзіна - Vatican News
У інтэрв’ю інфармацыйнаму агенцтву Fides генеральны вікарый архідыяцэзіі Мандалай, айцец Пітэр Сэйн Хлаінг У, распавёў аб тым, што баі ідуць ва ўсіх раёнах М’янмы, мірнае насельніцтва пакутуе ад ваенных сутыкненняў і бамбардзіровак, людзі вымушаныя пакідаць свае дамы.
У нядзелю, 15 чэрвеня, перад малітвай “Анёл Панскі” Папа Леў XIV нагадаў пра канфлікт у М’янме, які працягваецца, нягледзячы на перамір’е. “Заклікаю ўсе бакі стаць на шлях інклюзіўнага дыялогу – адзіны, які можа прывесці да мірнага і трывалага рашэння”, - сказаў Пантыфік.
Генеральны вікарый, як і ўвесь мясцовы Касцёл, удзячны Льву XIV за словы падтрымкі. “Мы дзякуем за яго словы і яго ўвагу да пакут нашага народа", - сказаў ён.
Айцец Пітэр распавёў аб тым, што нягледзячы на небяспеку, святары, манахі, манахіні і катэхеты працягваюць сваю місію, дапамагаючы людзям, асабліва пажылым, жанчынам і дзецям, якім бракуе нават самага неабходнага для жыцця.
Вікарый таксама адзначыў, што Касцёл Мьянмы працягвае кожны дзень маліцца “за народ, за мір, за будучыню нацыі”. "Мы працягваем спадзявацца на Бога ў гэтай жудаснай сітуацыі”, - адзначыў айцец Пітэр, дадаючы, што, акрамя вайны, архідыяцэзія Мандалай таксама сутыкнулася з наступствамі нядаўняга землятрусу, што яшчэ больш пагоршыла гуманітарны крызіс.
