Прымас Нідэрландаў: у Касцёле адбываюцца пакаленчыя змены
Аляксандр Амяльчэня - Vatican News
Кардынал Вілем Эйк, Прымас Нідэрландаў, падчас трэцяй Міжнароднай Біяэтычнай Канферэнцыі, якая адбылася ў Рыме 30 і 31 мая 2025 года, падкрэсліў важнасць адкрытага абвяшчэння каталіцкага вучэння ў пытаннях жыцця і біяэтыкі. У інтэрв'ю Эдгару Бельтрану з партала “The Pillar” ён падзяліўся сваім бачаннем будучыні Касцёла і ролі біяэтыкі ў сучасным свеце.
"Мусім супрацьстаяць сучаснай культуры, якая не прызнае ўнутранай вартасці чалавечага жыцця. Нашым заданнем з'яўляецца перадаваць праўду пра Бога, чалавека і свет, а таксама метафізічныя праўды і праўду адносна вартасцей і маральных нормаў", - адзначыў кардынал Эйк.
Нягледзячы на выклікі, звязаныя з легалізацыяй эўтаназіі, абортаў і аднаполых "шлюбаў" у Нідэрландах, кардынал бачыць прыкметы пазітыўных змен. "У апошнія некалькі гадоў я заўважыў у Нідэрландах растучую колькасць маладых людзей, якія просяць аб прыняцці ў Касцёл. Не так шмат, як у Францыі, але гэта выразная тэндэнцыя", - падзяліўся ён.
Паводле Прымаса Нідэрландаў, маладыя людзі адкрываюць Хрыста, Евангелле і маральнае вучэнне Касцёла праз інтэрнэт, TikTok і сацыяльныя медыя. "Калі яны прыходзяць да святара, каб папрасіць хросту ці канфірмацыі, яны ўжо валодаюць здзіўляюча вялікімі ведамі пра веру", - адзначыў ён.
Кардынал Эйк таксама расказаў пра свой досвед з курсамі падрыхтоўкі да шлюбу ў сваёй дыяцэзіі, дзе выкладаецца тэалогія цела і вучэнне Касцёла адносна кантрацэпцыі. "Рэакцыя пераважна такая: 'О, гэта цудоўна. Мы ніколі пра гэта не чулі'", - падкрэсліў ён.
На пытанне, чаму не адмовіцца ад гэтых цяжкіх тэм, кардынал Эйк адказаў: "Калі я гляджу на маладых людзей і тое, як яны прымаюць веру Касцёла, гэта дае мне шмат натхнення. Безумоўна, Касцёл будзе малы, вельмі малы. Ён ужо цяпер маргіналізаваны. Мне давялося закрыць шмат касцёлаў, асабліва на вёсцы, з прычыны недахопу актыўных вернікаў і фінансавых сродкаў. Але ў гарадах мы бачым, што парафіі квітнеюць, і там мы бачым большасць пладоў навяртання".
Кажучы пра ролю Папы і іерархіі, кардынал Эйк падкрэсліў важнасць яснага і адназначнага абвяшчэння веры. "Калі Пантыфік і біскупы, а таксама, вядома, святары, навучаюць ясна, гэта вельмі дапамагае людзям наноў адкрыць праўду Хрыста, Евангелле і шлях, якім яны могуць ісці за Ім", - адзначыў ён.
Паводле інфармацыі “The Pillar”, кардынал Эйк таксама выказаўся за абнаўленне энцыклікі "Evangelium Vitae" Папы Яна Паўла II, паколькі з часу яе публікацыі 30 гадоў таму з'явіліся новыя біяэтычныя праблемы, напрыклад, звязаныя з гендарнай ідэнтычнасцю і змяненнем біялагічнага полу.
