Хрысціяне і мусульмане Італіі супраць "страты чалавечнасці"
Аляксандр Амяльчэня - Vatican News
Прадстаўнікі хрысціянскай і мусульманскай супольнасцей Італіі выступілі з сумесным зваротам, у якім падкрэсліваюць неабходнасць аб'яднання намаганняў вернікаў для пераадолення крызісу чалавечнасці. Заклік, які атрымаў падтрымку кардынала Матэа Дзупі, старшыні італьянскага епіскапату, апублікаваны на сайце напярэдадні XXIV Дня хрысціяна-ісламскага дыялогу, запланаванага на 27 кастрычніка 2025 года.
Дзень хрысціяна-ісламскага дыялогу ў Італіі быў заснаваны пасля падзей 11 верасня 2001 года з мэтай супрацьдзеяння ісламафобіі і ўмацавання міжрэлігійнага ўзаемаразумення. Сёлетняя тэма – "У дыялогу дзеля аднаўлення чалавечнасці" – адлюстроўвае глыбокую заклапочанасць абедзвюх рэлігій сучасным станам грамадства.
Камітэт нагадвае, што Бог, якому моляцца хрысціяне і мусульмане – гэта Бог міру. Вернікі, аб'яднаныя духоўнай спадчынай Абрагама, заклікаюцца да адмаўлення ад гвалту і вайны, асабліва ў святле пакут насельніцтва Газы і іншых канфліктных рэгіёнаў. Ён заахвочвае падтрымліваць праекты прымірэння паміж палесцінцамі і ізраільцянамі.
Такія міжрэлігійныя ініцыятывы, лічаць ініцыятары, адпавядаюць бачанню Папы Льва XIV, які неаднаразова падкрэсліваў важнасць дыялогу паміж рэлігіямі і сумесных намаганняў Касцёла з іншымі вернікамі дзеля пабудовы больш справядлівага і братэрскага свету.
