Макрыцкас: з Францішкам мы адчулі блізкасць і ласку Божую
Марыя Валодзіна - Vatican News
На працягу дванаццаці гадоў увесь Каталіцкі Касцёл бачыў у Францішку жывы вобраз блізкасці, пяшчоты і ласкі Божай. Яго жэсты, мудрыя словы і шчырая ўсмешка глыбока краналі сэрцы людзей. Увесь гэты месяц, дзень за днём, бясконцы паток людзей ішоў да яго магілы, каб падзякаваць і памаліцца за Папу, чыё жыццё “заўсёды было злучана з жыццём Езуса, як галіна з вінаграднай лазой”, - адзначыў архіпрэзбітэр-каад’ютар Базілікі Санта-Марыя-Маджорэ.
“Пасля доўгага жыцця, цалкам прысвечанага служэнню Божаму народу, як святар, езуіт, біскуп і Папа, сёння яго душа вярнулася ў дом Айца, а цела спачывае ў доме Марыі”, - зазначыў кардынал Раландас Макрыцкас.
Жыццё і служэнне Францішка прынеслі багаты плён для ўсяго Касцёла. Ён быў глыбока з'яднаны з Хрыстом у радасці і смутку, таму “многія людзі, якія моляцца на яго магіле, злучаюцца з ім, а праз яго – з Хрыстом. Францішак умеў паказаць Хрыста кожнаму чалавеку, сведчачы пра яго кожны дзень, да апошняй гадзіны”, - дадаў іерарх.
Папа Францішак распачынаў кожны свой дзень з адарацыі, святой Імшы і асабістай малітвы. Ён заўсёды давяраў сябе апецы Маці Божай, схіляўся перад абразом Salus Populi Romani 126 разоў, - нагадаў кардынал Макрыцкас, просячы Марыю дапамагчы кожнаму з нас заставацца злучаным з Хрыстом “са шчырай пакорай і шчодрасцю”.
Напрыканцы гаміліі іерарх заклікаў да малітвы “за вечнае святло для Папы Францішка, пакорнага, мудрага і вернага слугі Евангелля, і за новага Святога Айца, Льва XIV, каб ён заставаўся непахісным у Пятровым служэнні”.
