Каталіцкі Касцёл ва Украіне спадзяецца на візіт Льва XIV
Аляксандр Амяльчэня - Vatican News
Старшыня Канферэнцыі Рымска-Каталіцкіх Біскупаў Украіны ў інтэрв'ю для “Vatican News” падкрэсліў важнасць заклікаў новага Папы да міру ва Украіне.
"Факт, што Святы Айцец з самага пачатку свайго пантыфікату згадвае пра Украіну, сведчыць пра тое, што Ён вельмі добра арыентуецца ў сітуацыі", – падкрэсліў іерарх, спасылаючыся на нядзельны зварот Льва XIV 11 мая 2025 года.
Скамароўскі таксама згадаў тэлефонную размову паміж прэзідэнтам Украіны і Папам 12 мая 2025 года, падчас якой кіраўнік дзяржавы запрасіў Пантыфіка наведаць краіну. "Вядома, Папа мог бы прыехаць ужо зараз, але ў такіх умовах было б немагчыма правесці паўнавартасны пастырскі візіт. Таму мы маем вялікую надзею, што вайна скончыцца і што мы зможам разам з ім радавацца дару міру, пра які мы так доўга просім", - сказаў старшыня ўкраінскага епіскапату.
На пытанне пра настроі суайчыннікаў біскуп прызнаў, што ёсць шмат стомленасці з прычыны вайны, але "мы маем сілу і надзею, каб абараняць нашу незалежнасць”. “Дар міру, пра які мы так моцна просім, вельмі жаданы ва Украіне", - дадаў Скамароўскі.
