Католікі Іспаніі: карнавал не месца для блюзнерства
Аляксандр Амяльчэня - Vatican News
Галоўнай прычынай абурэння стаў плакат, які рэкламуе карнавал у муніцыпалітэце Тэраса ў правінцыі Барселона на паўночным усходзе Іспаніі. Як паведамляе “Фундацыя хрысціянскіх адвакатаў” (FAC), на плакаце намаляваны біскуп, які поўзае на каленях і руках па цэнтры вуліцы ў чырвоных туфлях на высокіх абцасах.
Абражаюць веру за дзяржаўныя грошы
Паводле інфармацыі, справа аб зневажальным для католікаў плакаце ўжо была накіравана ў суд з некалькімі позвамі. Сярод арганізацый, якія падалі пазоў, знаходзіцца і “Таварыства каталіцкіх студэнтаў”. У сваёй заяве маладзёжная арганізацыя адзначыла, што пратэстуе супраць свядомай знявагі рэлігійных пачуццяў католікаў з выкарыстаннем грошай з дзяржаўных сродкаў.
Правакацыйныя дзеянні арганізатараў карнавалу
Міжканфесійная рада Тэрасы таксама далучылася да патрабаванняў аб неадкладным выдаленні плаката. Кіраўніцтва гэтай арганізацыі, якая аб'ядноўвае мусульман, пратэстантаў і мармонаў, указала на правакацыйны характар дзеянняў асоб, якія рэкламуюць карнавал плакатам, які высмейвае біскупа. Яны адзначылі, што плакат быў размешчаны, сярод іншага, на дзвярах пантэона на гарадскіх могілках у Тэрасе.
Гэты выпадак стаў адным з шэрагу інцыдэнтаў, звязаных з карнавальнымі мерапрыемствамі ў Іспаніі, якія ў апошні час выклікаюць усё большую занепакоенасць вернікаў. Каталіцкія арганізацыі падкрэсліваюць: святкаванне карнавалу не павінна ператварацца ў пляцоўку для знявагі рэлігійных перакананняў і сімвалаў, асабліва калі такія дзеянні фінансуюцца з грамадскай казны.
15 студзеня 2025 года іспанскія біскупы ўжо выказвалі занепакоенасць з нагоды павелічэння колькасці выпадкаў рэлігійнай нецярпімасці ў краіне, заклікаючы грамадства да большай павагі да рэлігійных пачуццяў усіх канфесій.
