У Парыжы адновіцца тур да вежаў катэдры Нотр-Дам
Ян Глінскі
Як паведамілі ў Цэнтры нацыянальнай спадчыны, які кіруе наведваннем помнікаў дзяржаўнай уласнасці, вежы парыжскай катэдры зможа наведваць абмежаваная колькасць чалавек – штогод не больш за 400 тысяч асобаў. Аднак у самім саборы змогуць прымаць да 30 тысяч гасцей у дзень.
У Цэнтры нацыянальнай спадчыны, між іншым, указалі на змену маршрута наведвання вежаў: цяпер яно будзе пачынацца з паўднёвай вежы, а не як было да гэтага – з паўночнай.
У першай зале на першым паверсе турысты ўбачаць макеты, якія прадстаўляюць асноўныя этапы будаўніцтва катэдры і гістарычныя падзеі, што тут адбываліся. Другая зала вышынёй у 40 метраў стане агляднай пляцоўкай на драўляную канструкцыю званіцы са званамі Марыя і Эмануэль. Да тэрасы, змешчанай на вышыні 69 метраў, можна будзе падняцца па новай лесвіцы, адолеўшы ў суме 422 прыступкі. Там наведвальнікі змогуць зблізку ўбачыць славутыя гаргульі. Адсюль таксама адкрываецца від на шпіль, адноўлены пасля пажару, і шырокая панарама Парыжа, дэталі якой будуць апісаны на дошках, размешчаных на тэрасе.
Спуск будзе адбывацца па вінтавой лесвіцы паўночнай вежы. Увесь візіт будзе суправаджацца адмыслова замоўленым “лёгкім” саўндтрэкам.
