Kardinal Mamberti: Papa Fransisk bütün gücü ilə öz missiyasına sadiq qaldı
Alessandro di Bussolo tərəfindən
Kardinal Mamberti öz vəzində qeyd etdi ki, Peter və Həvarilərin missiyası “Kilsəyə və bütün bəşəriyyətə xidmətə çevrilən sevginin özüdür”. Papa Fransisk isə “Rəbbin sevgisi ilə ruhlanaraq”, “bütün gücü tükənənədək” öz missiyasına sadiq qaldı. Bu fikir kardinal Mambertinin vəzində əsas mövzu kimi qeyd olundu. Messada oxunan İncil oxunuşu Yəhyanın İncilindən götürülmüşdü və Pasxanın III Rəbb gününün İncili idi. Orada dirilmiş İsa Tiberiya gölü sahilində bir neçə həvari ilə qarşılaşır və sonda Peterə missiyasını tapşırır və ona əmr edir: “Mənim ardımca gəl!”
İncilin sevincini bəyan etmək
Kardinal Mamberti bildirdi ki, bu İncil oxunuşu, Peterin yeni varisi üçün dua edən Kilsə üçün xüsusilə yerinə düşür. Çünki 7 may tarixində Konklav (yeni Papanın seçkiləri) başlayır. Həmçinin Həvarilərin İşləri kitabından olan ilk oxunuşda Peter və digərləri belə deyir: “Biz insanlara yox, Allaha itaət etməliyik.” Kardinal Mamberti xatırlatdı ki, Papa Fransisk də bu sözlərlə güclüləri xəbərdar etmiş, bütün bəşəriyyətə İncil sevincini, Mərhəmətli Atanı və Xilaskar Məsihi təbliğ etmişdir.
Peterin təvazökar sevgisi
Kardinal Mambert Papa XVI Benediktin sözlərini də xatırlatdı. O demişdi: “Şimon anlayır ki, İsa onun təqdim edə biləcəyi yeganə sevgi olan kasad sevgisindən razıdır.” Bu ilahi anlayış xəyanətin ağrısını bilən şagirdə ümid verir. Bu andan etibarən Peter Müəlliminin ardıca “öz zəifliyinin tam fərqində olaraq” gedir. Kardinal həmçinin Müqəddəs II İoann Pavelin də sözlərini xatırlatdı. O, pontifikatının 25-ci ildönümündə belə demişdi: “Hər gün ürəyimdə İsa ilə Peter arasında baş verən həmin dialoqu yenidən yaşayıram,” və hiss edirdim ki, İsa məni Peter kimi cavab verməyə təşviq edir: “Ya Rəbb, Sən hər şeyi bilirsən; bilirsən ki, mən Səni sevirəm.” Bundan sonra İsa ona yenidən öz vəzifələrini tapşırırdı.
Səcdənin əsas ölçüsü
Kardinal Mamberti Vəhy kitabından götürülən ikinci oxunuşu da xatırlatdı. Bu oxunuşda Allaha və Quzuya həmd və səcdə yer alır. Kardinal qeyd etdi ki, Papa Fransisk tez-tez vurğulayırdı: “Səcdə — Kilsənin missiyasının və mömin həyatının ayrılmaz bir hissəsidir.” 2024-cü ilin Epifaniya bayramındakı vəzində Papa təəssüflə demişdi: “Biz Allaha səcdə etmək vərdişini və onun gətirdiyi daxili dərinliyi itirmişik. Dua ruhunda keçirilən səcdənin gözəlliyini yenidən kəşf edək. Bu gün bizim aramızda səcdə ruhu çatışmır.”
Sonda Kardinal Mamberti vurğuladı ki, Papa Fransisk hər şeyi “Salus Populi Romani” – Romalıların Qurtuluşu olan Məryəm Ana ikonasının baxışları altında edirdi. O, bu ikona qarşısında Müqəddəs Məryəm Bazilikasında 126 dəfə dua etmişdi. “İndi isə o, bu sevimli ikonanın yaxınlığında dəfn olunub” – deyən kardinal, imanlıları Papanı Rəbbin Anası və bizim Anamız olan Məryəm Ananın şəfaətinə əmanət etməyə çağırdı.
Papa Fransisk üçün dua
İmanlıların duaları zamanı Kilsə Rəbbə dua etdi ki, Papa Fransiski Öz Padşahlığına qəbul etsin, onun Kilsənin duasına olan etimadını nəzərə alsın, “insani zəifliklərdən onu təmizləsin” və “sadiq qullara vəd olunan mükafatı” ona bəxş etsin.
