የሐምሌ 13/2017 ዓ.ም የ14ኛ መደበኛ ሣምንት እለተ ሰንበት ንባባት እና የቅዱስ ወንጌል አስተንትኖ
የእለቱ ንባባት
1. ኢሳያስ 66፡10-14
2. መዝሙር 65
3. ገላቲያ 6፡14-18
4. ሉቃስ 10፡1-12.17-20
የእለቱ ቅዱስ ወንጌል
ኢየሱስ ሰባውን ደቀ መዛሙርት መላኩ
ከዚህም በኋላ ጌታ ሌሎች ሰባ ሁለት ሰዎችን መረጠ፤ ሁለት ሁለትም አድርጎ ራሱ ሊሄድበት ወደአሰበው ከተማና ስፍራ ሁሉ አስቀድሞ ላካቸው። እርሱም እንዲህ አላቸው፦ “መከሩ ብዙ ነው፤ ሠራተኞች ግን ጥቂቶች ናቸው፤ ስለዚህ የመከሩን ጌታ ለመከሩ ሠራተኞችን እንዲልክ ለምኑት። እንግዲህ ሂዱ፤ እነሆ፥ እንደ በጎች በተኩላዎች መካከል እልካችኋለሁ። ቦርሳም ከረጢትም ጫማም አትያዙ፤ በመንገድ ላይ ለማንም ሰላምታን አትስጡ። ወደምትገቡበትም ቤት ሁሉ አስቀድማችሁ፦ ‘ሰላም ለዚህ ቤት ይሁን፤’ በሉ። በዚያም የሰላም ልጅ ቢኖር፥ ሰላማችሁ በእርሱ ላይ ያድርበታል፤ ካልሆነ ግን ይመለስላችኋል። ለሠራተኛ ደሞዙ ይገባዋልና እነርሱ የሚሰጡአችሁን እየበላችሁና እየጠጣችሁ በዚያው ቤት ተቀመጡ። ከቤት ወደ ቤት አትዘዋወሩ። ወደምትገቡባትም ከተማ ሁሉ ቢቀበሉአችሁ፥ የሚያቀርቡላችሁን ብሉ፤ በእርሷም ያሉትን ሕሙማንን ፈውሱና፦ ‘የእግዚአብሔር መንግሥት ወደ እናንተ ቀርቦአል፤’ በሉአቸው። ነገር ግን ወደምትገቡባት ከተማ ሁሉ ባይቀበሉአችሁ፥ ወደ አደባባዮቹዋ ወጥታችሁ እንዲህ በሉ፦ ‘ከከተማችሁም በእግሮቻችን ላይ የተጣበቀብንን ትቢያ ሳይቀር እናንተን በመቃወም እናራግፋለን፤ ነገር ግን የእግዚአብሔር መንግሥት ቀርቦአል፥ ይህን እወቁ።’ በዚያን ቀን ከዚያች ከተማ ይልቅ ለሰዶም ይቀልላታል እላችኋለሁ።
የሰባው ደቀ መዛሙርት መመለስ
ሰባዎቹም ሰዎች በደስታ ተመልሰው፦ “ጌታ ሆይ! አጋንንት እንኳ በስምህ ተገዝተውልናል፤” አሉት። ኢየሱስም እንዲህ አላቸው፦ “ሰይጣንን እንደ መብረቅ ከሰማይ ሲወድቅ አየሁት። እነሆ፥ እባቡንና ጊንጡን እንድትረግጡ፥ በጠላትም ኃይል ሁሉ ላይ ሥልጣን ሰጥቻችኋለሁ፤ የሚጐዳችሁም ምንም ነገር የለም። ነገር ግን መናፍስት ስለ ተገዙላችሁ በዚህ ደስ አይበላችሁ፤ ይልቁንም ስማችሁ በሰማያት ሰለ ተጻፈ ደስ ይበላችሁ።”
የእለቱ ቅዱስ ወንጌል አስተንትኖ
የተወደዳችሁ ወንድሞቼ እና እህቶቼ እንደምን አረፈዳችሁ!
በዚህ የእሁድ ስርዓተ አማልኮ ላይ የተነበበልን ቅዱስ ወንጌል ውስጥ፣ “ጌታም ሰባ ሁለት [ደቀ መዛሙርትን] ሾሞ፣ ሊመጣ ወዳለው ከተማና ስፍራ ሁሉ ሁለት ሁለት አድርጎ በፊቱ ላካቸው” (ሉቃ 10፡ 1) ይለናል። ደቀ መዛሙርቱ የተላኩት ሁለት ሁለት ሆነው ነው እንጂ በግለሰብ ደረጃ አልነበረም። ሁለት ሁለት ሆኖ ወደ ተልእኮ መሄድ፣ ከተግባራዊ እይታ አንጻር ከጥቅሙ ይልቅ ጉዳቱን የሚያመጣ ይመስላል። ሁለቱ የማይግባቡበት፣ በተለያየ ፍጥነት የሚሄዱበት፣ አንዱ በመንገዳችን ላይ የሚደክም ወይም የሚታመምበት፣ ሌላው እንዲቆም የሚያስገድድ አደጋ አለ። አንዱ ብቻውን በሚሆንበት ጊዜ፣ በሌላ በኩል፣ ጉዞው ፈጣን እና ለስላሳ የሚሆን ይመስላል። ይሁን እንጂ ኢየሱስ እንዲህ አላሰበም፣ ሁለት ሁለት የሚሄዱትን ደቀ መዛሙርት እንጂ ብቻቸውን የሚሄዱ ሰዎችን አላከም። እስቲ እራሳችንን አንድ ጥያቄ እንጠይቅ፣ የዚህ ጌታ ምርጫ ምክንያቱ ምንድን ነው?
ሕዝቡ ኢየሱስን እንዲቀበሉ ለማዘጋጀት ወደ መንደሮች ቀድመው መሄድ የደቀ መዛሙርት ተግባር ነበር፣ እናም እሱ የሰጣቸው መመሪያ ምን ማለት እንዳለባቸው ሳይሆን ምን መሆን እንዳለባቸው ብቻ ሳይሆን፣ ማለትም በቃላት ሐረግ በሚናገሩት ነገር ሳይሆን በህይወት ምስክርነት ከሚናገሩት ቃላት ይልቅ ምስክርነት መስጠት እንዳለባቸው ይናገራል። በእርግጥም እነርሱን እንደ ሠራተኞች አድርጎ ገልጿቸዋል፣ ስለዚህም መሥራት ይጠበቅባቸዋል፣ በባህሪያቸው ወንጌልን ይሰብካሉ። ደቀ መዛሙርቱ ተልእኳቸውን የተወጡበት የመጀመሪያው ተግባራዊ እርምጃ በትክክል ሁለት ሁለት ሆኖ መሄድ ነው። ደቀ መዛሙርቱ "ነጻ ተጓዦች" አይደሉም፣ ቃሉን ለሌላው እንዴት መስጠት እንደሚችሉ የማያውቁ ሰባኪዎች አልነበሩም። ወንጌልን የሚያበስረው በዋነኛነት የደቀ መዛሙርቱ ሕይወት ነው፡ እንዴት አብረው እንደሚሆኑ ያውቃሉ፣ እርስ በርስ መከባበር፣ ከሌላው የበለጠ ችሎታ እንዳላቸው ማረጋገጥ አለመፈለግ እና ስለ አንዱ መምህር የሚጠቅሱ ናቸው።
ፍጹም የሆነ የሐዋርያዊ ዕቅዶች ሊዘጋጁ ይችላሉ፣ እና በጥሩ ሁኔታ የተነደፉ ፕሮጀክቶች እስከ መጨረሻው ዝርዝር ድረስ ተደራጅተዋል፣ አንድ ሰው ብዙ ሰዎችን ሊጠራ እና ብዙ መንገዶች ሊኖረው ይችላል፤ ነገር ግን ለወንድማማችነት ፈቃደኛነት ከሌለ ተልዕኮው ወደፊት ሊራመድ አይችልም። በአንድ ወቅት፣ አንድ ሚስዮናዊ ከማሕበሩ አባል ጋር ሆኖ እንዴት ወደ አፍሪካ እንደሄደ ተናገረ። ይሁን እንጂ ከተወሰነ ጊዜ በኋላ ከእርሱ ተለየ በአንድ መንደር ውስጥ ብቻውን በመኖር እና ለህብረተሰቡ የሚጠቅሙ ተከታታይ የግንባታ ፕሮጀክቶችን በተሳካ ሁኔታ ተግባራዊ አድርጓል። ሁሉም ነገር በጥሩ ሁኔታ እየሰራ ነበር። ግን አንድ ቀን ድንጋጤ አጋጠመው፡ በህይወቱ ጥሩ ስራ ፈጣሪ እንደሆነ ተገነዘበ። ግን… እና ያ “ግን” እዚያ ቀረ። ስለዚህ የሥራውን ሁኔታ ለሌሎች፣ ለምእመናን ትቶ፣ ከእርሱ ጋር ተቀላቀለ። ስለዚህም ጌታ ደቀ መዛሙርቱን “ሁለት ሁለት” የላካቸው ለምን እንደሆነ ተረድቷል፡ የወንጌል ተልእኮው በግል እንቅስቃሴ ማለትም “በማድረግ” ላይ የተመሰረተ ሳይሆን በወንድማማችነት ፍቅር ምስክርነት ላይ የተመሰረተ ነው፣ አብሮ መኖር በሚያስከትላቸው ችግሮች ውስጥ እንኳን ቢሆን።
ስለዚህ የወንጌልን ምሥራች ለሌሎች እንዴት እንወስዳለን? ይህን የምናደርገው በወንድማማችነት መንፈስ እና ዘይቤ ነው ወይስ በአለም አይነት ራስን በማስተዋወቅ፣ በፉክክር እና በብቃት? መተባበር እንችል እንደሆነ እራሳችንን እንጠይቅ፣ ውሳኔዎችን በጋራ እንዴት እንደምንወስን እናውቃለን፣ ከጎናችን ያሉትን ከልብ የምናከብራቸው እና የእነሱን አመለካከት ግምት ውስጥ የምናስገባ እና የምናደርገው በራሳችን ሳይሆን በማህበረሰብ ውስጥ ነው። በእርግጥም፣ የደቀ መዝሙሩ ሕይወት የመምህሩ ሕይወት እንዲያበራ፣ በእውነት ለሌሎች በማወጅ ከሁሉም በላይ በዚህ መንገድ መጓዝ እንችላለን።
የቤተክርስቲያን እናት ድንግል ማርያም በወንድማማችነት ምስክርነት የጌታን መንገድ እንዴት ማዘጋጀት እንዳለብን በአማላጅነቷ ታስተምረን።
ቀደም ሲል እንደ ሰማነው ከሆነ የዛሬው የወንጌል ክፍል (ሉቃ. 10፡1-12፣ 17-20) ከ12ቱ ሐዋርያት በተጨማሪ 72 ደቀ መዛሙርትን ወደ ተልዕኮ የላከውን ኢየሱስን ያቀርብልናል። 72 ቁጥር የሚያመለክተው ሁሉንም ብሔሮች ነው። በእርግጥ፣ በዘፍጥረት መጽሐፍ 72 የተለያዩ ብሔራት ተጠቅሰዋል (ዘፍጥረት 10፡1-32)። ስለዚህ፣ ይህ የምያስተላልፈው መልእክት የቤተክርስቲያኗ ተልእኮ ለሰዎች ሁሉ ወንጌልን መስበክ መሆኑን ያሳያል። ኢየሱስ ደቀ መዛሙርቱን “መከሩ ብዙ ነው፣ ሠራተኞች ግን ጥቂቶች ናቸው፤ እንግዲህ የመከሩን ጌታ ወደ መከሩ ሠራተኞች እንዲልክ ለምኑት!” አላቸው (ሉቃስ 10:2)።
ይህ የኢየሱስ ልመና ሁል ጊዜ ትክክለኛ ነው። ሁልጊዜም ወደ “መከሩ ጌታ” ማለትም ወደ እግዚአብሔር አብ ሠራተኞችን ወደ እርሻው እርሱም ወደ ዓለም እንዲልክ መጸለይ አለብን። እናም እያንዳንዳችን በተከፈተ ልብ፣ በሚስዮናዊነት አመለካከት ማደግ አለብን። ጸሎታችን ለፍላጎታችን እና ለምንሻቸው ነገሮች ብቻ የተገደበ መሆን የለበትም፡ ጸሎት ሁለንተናዊ ገጽታ ካለው በእውነት ክርስቲያናዊ ነው።
ኢየሱስ 72ቱን ደቀ መዛሙርት በመላክ የተልእኮውን ባህሪያት የሚገልጹ ትክክለኛ መመሪያዎችን ሰጣቸው። የመጀመሪያው ቀደም ብለን እንዳየነው፡ ልዩ የሚለው ሲሆን ሁለተኛው ደግሞ ሂዱ የሚለው ቃል ነው። ከዚያም ምንም ቦርሳም ከረጢትም ጫማም አትያዙ ... በማለት ያዘዛቸው ሲሆን ‘ሰላም ለዚህ ቤት ይሁን’ በሉ... በዚያው ቤት ቆዩ... ከቤት ወደ ቤት አትሂዱ... በእዚያም የታመሙትን ፈውሱና ‘የእግዚአብሔር መንግሥት ወደ እናንተ ቀረበች’ በሏቸው።” ካልተቀበሏችሁ ደግሞ ወደ ጎዳና ውጡና በእግሮቻችሁ ላይ ያለውን የከተማቸውን አቧራ አራግፋችሁ ከእዚያ ውጡ (ሉቃስ 10፡ 2-10) በማለት ያዛቸዋል። እነዚህ አስፈላጊ ነገሮች የሚያሳዩት ተልእኮው በጸሎት ላይ የተመሠረተ መሆኑን ነው፤ መለያየትና ድህነት፣ ሰላምና ፈውስን እንደሚያመጣ፣ የእግዚአብሔር መንግሥት መቃረብን የሚያሳዩ ምልክቶች፣ ማወጅና መመስከር ሳይሆን፣ የድኅነት መልእክትን ውድቅ የማድረግን ኃላፊነት በማጉላት፣ የወንጌል ነፃነትን የሚጠይቅ ነው።
በእነዚህ ቃላት ውስጥ ከኖረ፣ የቤተክርስቲያኑ ተልእኮ በደስታ ተለይቶ ይታወቃል። እና ይህ ምንባብ እንዴት ያበቃል? 72ቱ “በደስታ ተመለሱ” (ሉቃስ 10፡17)። ከተልዕኮው ስኬት የሚፈሰው ጊዜያዊ ደስታ አይደለም፣ በተቃራኒው በተስፋው ውስጥ የተመሰረተ ደስታ ነው - ኢየሱስ እንዳለው "ይልቁንም ስማችሁ በሰማያት ሰለ ተጻፈ ደስ ይበላችሁ” (ሉቃስ 10፡20)። በዚህ አገላለጽ ውስጣዊ ደስታን እና ልጁን እንዲከተል በእግዚአብሔር መጠራቱ የሚወለደው የማይጠፋ ደስታ ማለት ነው። ደቀ መዛሙሩ የመሆን ደስታ ማለት ነው። ዛሬ፣ ለምሳሌ፣ እያንዳንዳችን፣ በጥምቀት ቀን የተቀበልነውን ስም ልናስብ እንችላለን፡ ይህ ስም በእግዚአብሔር አብ ልብ ውስጥ “በሰማይ የተጻፈ” ነው። እናም እያንዳንዱን ደቀ መዝሙር፣ ከጌታ ኢየሱስ ጋር አብረው የሚሄዱት፣ ከራሱ እና ከንብረት ነፃ ሆነው እራሳቸውን ለሌሎች ለማዋል ከእርሱ የተማሩትን ሚስዮናዊ የሚያደርጋቸው የስጦታው ደስታ ነው።
የክርስቶስን ደቀ መዛሙርት በየስፍራው ያሉትን ተልእኮ እንድትደግፍ የተጠራችሁ እመቤታችን ቅድስት ማርያም ጥበቃን እንለምናለን። እግዚአብሔር የሚወደንን፣ ሊያድነን የሚፈልገውን እና ወደ መንግሥቱ እንድንቀላቀል የሚጠራንን ለሁሉም የማወጅ ተልዕኮ እንድንወጣ እርሷ በአማላጅነቷ ትርዳን።
ምንጭ፡ አዘጋጅ እና አቅራቢ አባ መብራቱ ኃ/ጊዮርጊስ- ቫቲካን
