杏MAP导航

Na Salvatore Cernuzio – Vatican.

Mapumziko kwa ajili ya uponyaji wa Papa Francisko unaendelea katika makazi yake ya Nyumba ya Mtakatifu Marta kwa kuendelea na matibabu, mwendelezo wa mazoezi ya viungo yanayohusiana na kupumua, hasa kwa ajili ya kupona sauti, sala ya kibinafsi, na kuadhimisha Misa katika kikanisa cha makazi yake. Haya yalikuwa miongoni mwa masasisho ambayo Ofisi ya Habari ya Vatican  ilitoa kwa waandishi wa habari walioidhinishwa kuhusu afya ya Papa baada ya kuruhusiwa Dominika tarehe 23 Machi 2025, kufuatia siku 38 za kulazwa katika Hospitali ya Gemelli, Roma kutokana na nimonia ya pande mbili. Baada ya kusalimiana na watu 3,000 kutoka kwenye balcony ya hospitali hiyo na kusimama kwa muda mfupi kwenye Kanisa Kuu  Mtakatifu Maria Mkuu, Papa Francisko alirejea katika makazi yake ya Vatican, katika nyumba ya Mtakatifu Marta, ambako alianza kipindi chake cha kuendelea na tiba na  kupumzika. Kipindi cha Papa cha kupata nafuu na kupumzika katika makazi yake kinapaswa kuwa kama "miezi miwili," alisisitiza Daktari Sergio Alfieri, daktari anayesimamia kulazwa kwa Papa katika hospitali ya Gemelli, na Dk Luigi Carbone, daktari wake wa kibinafsi, katika mkutano wa waandishi wa habari Jumamosi jioni tarehe 22 Machi 2025 katika Hospitali ya Gemelli.

Matibabu, tiba ya mwili, na oksijeni

Kwa mujibu wa Taarifa ya Ofisi ya Habari, ilibainisha Jumanne, Machi 25  kuwa: "Papa, anafuata mpango wa kupona kama ilivyoelezwa na madaktari Jumamosi." Wakati huo, Madaktari Alfieri na Carbone walisema kwamba Baba Mtakatifu lazima aendelee na matibabu ya dawa “kwa muda mrefu, yakitolewa kwa mdomo,” huku akifanyiwa mazoezi ya viungo yanayohusiana na kupumua, akiendelea kama alivyokuwa akifanya kila siku katika Gemelli. Madaktari hao pia walimshauri aepuke mikutano, iwe ya mtu binafsi au kikundi, na apokee usaidizi wa kitiba wa saa 24 ili kuandalia mahitaji yake, kutia ndani matibabu ya oksijeni, na kushughulikia hali zozote za dharura zinazoweza kutokea. Huduma hii inatolewa na Kurugenzi ya Afya na Usafi ya Jiji la Vatican na timu ya madaktari daima iko pamoja na Papa. Baba Mtakatifu anaendelea kupokea matibabu ya oksijeni chini ya hali sawa na wakati wa kulazwa kwake - oksijeni ya mtiririko wa juu kupitia mirija  za pua wakati wa usiku, na kupungua kwa taratibu kwa matibabu ya oksijeni wakati wa mchana.

Misa na shughuli za kazi

Kama Papa alivyofanya hospitalini, ambapo alikuwa ameadhimisha Misa katika kikanisa cha ghorofa ya kumi, sasa anatembelea kikanisa cha ghorofa ya pili ya nyumba ya Mtakatifu Marta ili kuadhimisha Misa. Aidha, anaendelea na shughuli za kazi, kwa mujibu wa uwezo mdogo uliotajwa hapo awali. Kwa hakika, taarifa ya adhuhuri ya Taarifa ya Ofisi ya habari Vatican ilitangaza kuteuliwa kwa Askofu Mkuu Ignazio Ceffalia kuwa Balozi wa Vatican wa Belarus na Monsinyo Francesco Ibba kama Mtetezi wa Dhamana katika Mahakama ya Rota Romana. Hakuna maelezo kamili ambayo yametolewa kuhusu ratiba ya Papa ya siku zijazo, wala kwa matukio yajayo kama vile sherehe mbalimbali za Jubilei au ibada za Juma Kuu Takatifu. Kama madaktari walivyosisitiza, kupona kwake kunafuatiliwa kwa karibu, na wanangojea "maboresho ya vipimo vya kliniki yanayotarajiwa." Wakati huo, Madaktari Alfieri na Carbone walisema kwamba Baba Mtakatifu lazima aendelee na matibabu ya dawa “kwa muda mrefu, yakitolewa kwa mdomo,” huku akifanyiwa mazoezi ya viungo yanayohusiana na kupumua, akiendelea kama alivyokuwa akifanya kila siku katika Gemelli.

Katekesi iliyoandikwa

Jumatano, Machi 26, hakuna katekesi, kama vile ilivyokuwa juma zilizopita. Badala yake, maandishi yaliyotayarishwa ya katekesi ya Papa yatasambazwa kwa njia ya maandishi, kama ilivyofanywa kwa siku zilizopita  za kila Jumatano tangu Februari 14. Vile vile inaweza kutokea JDominika kwa ajili ya Malaika wa Bwana, ingawa masasisho bado yanasubiriwa. Kwa sasa, matarajio ni kwamba ujumbe wa Papa utatolewa na Ofisi ya Habari ya Vatica ni  sawa na Dominika zilizopita. Papa Francisko, hapokei wageni kwa wakati huu na amewaona tu washirika wake wa karibu zaidi katika siku mbili zilizopita. Hakuna mipango iliyotangazwa kuhusu ziara zilizoratibiwa kutoka kwa Wakuu wa Nchi na serikali.

Tafakari ya Daktari Sergio Alfieri

Ripoti zinaonesha kuwa Papa Francisko ana furaha kuwa nyumbani. Dk. Alfieri na Carbone hapo awali wametaja roho nzuri ambazo Papa alizipata baada ya afya yake kuimarika. Awamu ya hatari zaidi ya ugonjwa wake imepita, na maambukizo makali zaidi yameshinda, kama ilivyothibitishwa katika mkutano wa waandishi wa habari wa Gemelli. Wakati wa mkutano huo, Dk. Alfieri alifichua kwamba Papa alikabiliwa na nyakati mbili muhimu ngumu  ambapo maisha yake yalikuwa hatarini. Katika mahojiano na gazeti la kila siku la Italia la "Corriere della Sera" Dk. Alfieri alikumbuka kwamba wakati mbaya zaidi ulitokea alasiri ya tarehe 18 Februari, wakati hali ya Papa Francisko ilizidi kuwa mbaya kwa sababu ya ugonjwa wa mapafu. “Kwa mara ya kwanza,” alisema, “niliona machozi machoni pa baadhi ya watu waliokuwa karibu naye, watu ambao, kama nilivyoelewa wakati wa kulazwa hospitalini, wanampenda kiukweli kama baba.  Sote tulijua kuwa hali ilikuwa mbaya zaidi na kwamba kulikuwa na hatari ya kweli kwamba asingeweza kuinuka. “Ilitubidi kuamua kama tusimame na kumwacha aende au tusonge mbele kwa kutumia dawa na tiba zote zinazowezekana, licha ya hatari kubwa ya kuharibu viungo vingine. Mwishowe, tulichagua kupambana, Daktari huyo alieleza na kuongeza kuwa "uamuzi wa mwisho ulitolewa na Papa mwenyewe."

Ombi la Papa kusema ukweli

Papa Francisko alisisitiza kuwa na taarifa kamili kuhusu afya yake kuanzia siku ya kwanza. "Alituomba tumwambie ukweli, na alitaka ukweli kuhusu hali yake utangazwe," alisema Dk. Alfieri. Kuhusu masasisho yaliyoandikwa ili kushinikiza hali ya Papa, Dk. Alfieri alisema kuwa taarifa za matibabu ziliwasilishwa kwa makatibu wa Papa Francisko, ambao waliongeza maelezo zaidi kabla ya kupata kibali chake. "Hakuna kitu," alisema, "kilichowahi kubadilishwa au kuzuiwa. Anao watu karibu naye ambao ni kama familia, na wako karibu naye kila wakati."