Padre Sosa Js,amkumbuka Papa Francisko kwa sifa ya kutembea pamoja mchungaji na kondoo wake
Na Angella Rwezaula – Vatican.
Kufuatia na kifo cha Baba Mtakatifu Francisko kilichotokea asubuhi ya siku ya Jumatatu ya Pasaka tarehe 21 Aprili 2025, na ambaye alikuwa ni mtawa wa Shirika la kijesuit, Mkuu wa Shirika hilo Padre Arturo Sosa, SJ amewaandikia wanashirika wote katika barua iliyochapishwa katika ukurasa wa tovuti ya shirika hilo. Katika maandishi hayo, Padre Sosa anabainisha kuwa Shirika la Yesu linashiriki huzuni na watu wote wa Mungu, waliounganishwa pamoja ndani ya Kanisa, katika umoja na watu wengine wengi wenye mapenzi mema, mwishoni mwa maisha ya hapa duniani ya Baba Mtakatifu Francisko. Linafanya hivyo kwa hisia za kina na kwa utulivu uliotokana na tumaini thabiti katika ufufuko ambao kupitia huo Bwana Yesu alitufungulia mlango wa kushiriki kikamilifu katika maisha ya Mungu. Tunaomboleza kifo cha mmoja ambaye aliwekwa kwenye huduma ya Kanisa la Ulimwengu na kutekeleza huduma ya Mrithi wa Petro kwa zaidi ya miaka 12. Wakati huohuo, tunahisi kuondoka kwa ndugu yetu mpendwa katika Shirika la Kisesuit, Jorge Mario Bergoglio. Katika Jumuiya, tumeshiriki karama ile ile ya kiroho na namna ile ile ya kumfuata Bwana Wetu Yesu Kristo.
Tunasikitishwa na kuondoka kwake, na bado hisia kubwa ya shukrani inabubujika kutoka mioyoni mwetu kwa Mungu Baba, mwingi wa rehema, kwa ajili ya mema mengi tuliyopokea kwa njia ya huduma ya maisha yote na kwa jinsi Papa Francisko alivyojua jinsi ya kuliongoza Kanisa wakati wa upapa wake, katika ushirika na mwendelezo na watangulizi wake katika utekelezaji wa Mtaguso wa Pili wa Kiekumene katika kutekeleza Mtaguso mkuu wa Vatican. Papa Francisko aliendelea kutazama kile kinachoendelea duniani ili kutoa neno la matumaini kwa wote. Nyaraka zake za ajabu: Laudato Si' na Fratelli tutti hazifunui uchambuzi wa kina wa hali ya ubinadamu tu, bali katika mwanga wa Injili, pia kutoa njia za kuondoa sababu za ukosefu wa haki na kukuza upatanisho. Kwa Baba Mtakatifu Francisko, mazungumzo kati ya wapinzani wa kisiasa au kati ya dini na tamaduni, ndiyo njia ya kuendelea kutoa mapendekezo ya amani na utulivu wa kijamii, ili kujenga mazingira ya kuelewana, kujaliana na kusaidiana katika mshikamano. Mara nyingi, tulisikiliza maneno yake, tafakari yake ya kichungaji na tulivutiwa na shughuli yake isiyochoka, alipokuwa akipendekeza mipango au kujiunga na ya wengine, siku zote akiwa anaamini thamani ya neno na kukutana.
Tunawezaje kusahau wakati wa ajabu wa maombi ambayo yeye mwenyewe alifanya mbele ya dharura ya Janga la virus vya uviko mnamo Machi 2020, katika uwanja uwanja ukiwa wazi wa Mtakatifu Petro?Au wasiwasi wa mara kwa mara wa amani katika uso wa kutovumiliana na vita ambavyo vinatishia kuishi pamoja kimataifa na kusababisha mateso yasiyoelezeka kati ya wasio na ulinzi. Au huruma ya moyo wake na mtiririko mkubwa wa watu waliohamishwa kwa lazima ulimwenguni kote, hasa wale waliolazimishwa kuhatarisha maisha yao kuvuka Mediterania.Katika maneno yaliyosemwa jioni ya tarehe 13 Machi 2013, wakati wa kuwasalimu waamini waliokusanyika katika Uwanja wa Mtakatifu Petro kumkaribisha Papa mteule, tayari tunapata mambo mawili muhimu ya huduma yake: umuhimu wa kutembea pamoja, Askofu na watu, katika njia ya udugu, upendo, uaminifu na matumaini; na kiini cha maombi, hasa yale ya maombezi. Umuhimu uliotolewa kwa maendeleo ya Sinodi ya Maaskofu na umakini uliotolewa kwa sinodi kama sehemu msingi ya kuwa Kanisa ni mfano wa “kutembea pamoja.”
Kwa vyovyote vile haupunguzi Ukuu wa Petro au wajibu wa kiaskofu; kinyume chake, unaruhusu utumike kwa ushiriki wa fahamu wa wabatizwa wote, wa watu wa Mungu njiani, wakitambua uwepo na utendaji wa Bwana kwa njia ya Roho wake Mtakatifu katika maisha ya jumuiya ya kikanisa. Mwaliko wa sala, ambao aliufanya usiku ule kwa waamini wote, umesisitizwa katika kumbukumbu yetu: Tusali pamoja, Askofu na watu. Ninawaomba mniombee kwa Bwana anibariki. Katika kipindi chote cha upapa, alihitimisha hotuba zake, ikiwa ni pamoja na Sala za Malaika wa Bwana za kila Dominika, kwa mwaliko uleule: tafadhali msisahau kuniombea. Hakuchoka kutukumbusha jinsi ambavyo maombi yanavyozaliwa kwa kumtumaini Mungu na kumfahamu. Katika maombi, tunaweza kugundua siri ya maisha ya watakatifu (taz, Katekesi ya tarehe 28 Septemba 2022). Alipohutubia sisi, Wajesuit, alisisitiza kila mara juu ya umuhimu wa kuhifadhi nafasi ya kutosha katika utume wetu wa maisha kwa ajili ya maombi na kuzingatia uzoefu wa kiroho. Tunahitaji kukumbuka kile tu alichoniandikia katika barua yake ya tarehe 6 Februari 2019, akiwasilisha idhini yake na uthibitisho wa Mapendeleo ya Kitume ya Kiulimwengu: Upendeleo wa kwanza (kuonesha njia ya kumwendea Mungu kupitia mafuno ya Kiroho na utambuzi) ni muhimu kwa sababu unaonesha kama hali ya msingi uhusiano wa Mjesuit na Bwana, katika maisha ya kibinafsi na ya kijumuiya ya maombi na utambuzi.
Ninapendekeza, katika utumishi wako kama Mkuu wa shirika, usisitize juu ya hili. Bila mtazamo huu wa maombi mapendeleo mengine hayatazaa matunda. Alisisitiza kwa njia hiyo mawaidha aliyoyatoa katika mkutano mkuu wa 36 wa shirika (24 Oktoba 2016), aliposisitiza sana hitaji la kuomba faraja kila wakati, tukijiruhusu kusukumwa na Bwana aliyepigiliwa misumari msalabani ambaye anatusogeza kwa huduma ya wengi waliosulubiwa katika dunia ya leo. Katika kipindi hicho, alituonesha jambo ambalo tunaweza kufikiria kuwa sehemu muhimu ya utambulisho wetu. Kana kwamba anajibu swali lisiloeleweka kuhusu Mjesuit ni nani, Papa Francisko alihutubia katika mkutano huo kwa kuthibitisha kwamba Mjesuit ni mtumishi wa furaha ya Injili katika utume wowote anaofanya. Kutokana na furaha hii hutiririka utii wetu kwa mapenzi ya Mungu, kutumwa kwetu kwa huduma ya utume wa Kanisa na utume wetu pamoja na uwepo wetu kwa ajili ya huduma ya maskini. Ni furaha hii ambayo inapaswa kubainisha njia yetu ya kuendelea ili iwe ya kikanisa, ya kiutamaduni, maskini, yenye kulenga utumishi, isiyo na tamaa yoyote ya kidunia.
Wito wa furaha unaotoka kwa Msulubiwa na Injili yake ambayo kwayo habari hii ya kufariji inatangazwa imekuwa ni sifa ya kudumu ya Upapa wa Papa Francisko. Ni kwa msingi wa uhusiano ulio hai na wa uzima na Bwana, unaosimikwa katika faraja na furaha, kwamba tutaweza kuwa na shughuli za kichungaji, lakini zaidi ya yote kwa ushuhuda wa maisha yaliyotolewa kabisa kwa huduma ya Kanisa; Bibi arusi wa Kristo, chachu ya Kiinjili ya ulimwengu, katika utafutaji usiokoma wa utukufu wa Mungu na mema ya roho (Majibu ya Papa Francisko kwa pongezi za Padre Adolfo Nicolas kwa kuchaguliwa kwake, 16 Machi 2013). Tunakumbuka kwa mioyo yenye shukrani umakini na uangalifu wa Baba Mtakatifu Francisko kwa Jumuiya ya Yesu, maisha yetu na utume wetu. Wengi wenu mliweza kukutana naye katika nchi mbalimbali za dunia kwa sababu siku zote alikuwa na wakati wa kushiriki kwa uwazi na kindugu na Wajesuiti walioishi na kufanya kazi katika maeneo aliyotembelea. Tunamsindikiza Baba Mtakatifu Francisko kwa mioyo na sala zetu katika mkutano wake wa uhakika na Mungu wa upendo usio na masharti na huruma isiyo na kikomo ambaye uso wa Papa Francisko alituonyesha kwa maisha na mafundisho yake. Tukiwa na uhakika kwamba Bwana anamkaribisha Mtumishi wake mwaminifu kwenye karamu ya mbinguni na kusukumwa na mfano wake, tunafanya upya hamu yetu na kujitolea kwetu kumfuata Yesu maskini na mnyenyekevu na kutumikia Kanisa lake.