Zjarri i Dashuris?: Maria Magdalen? nd?rmjet artit e fes?, n? Agrigento
R.SH. - Vatikan
Ta quajmë thjesht ekspozitë do të ishte nënvlerësim. Nuk i mungojnë kryeveprat e mëdha, por ngjarja, që zgjat deri më 30 tetor në Muzeun Dioqezan të Agrigentos, është shumë më tepër: udhëtim introspektiv që synon të përcjellë, përmes imazheve të mrekullueshme të artit, nga Mesjeta deri në shekullin e 19-të, gjendjen njerëzore dhe udhëtimin ndonjëherë të mundimshëm të krishterë: nga dështimet - në pendim, rimëkëmbje dhe kthesë.
Frymëzimi buron nga apostullja e apostujve, dëshmitarja e parë e Ngjalljes. Asaj ia kushton Ekspozitën me titull "Zjarri i Dashurisë: Maria Magdalena, Dëshmitare e Shpresës Femërore", Dikasteri i Selisë së Shenjtë për Kulturën. Grua misterioze, dëshmitare e heshtur e dhimbjes dhe më pas, e gëzimit, "figurë komplekse", siç e përshkruan Domenica Brancato, Drejtoreshë e Muzeut Dioqezan të Agrigentos: "Maria Magdalena ndonjëherë nuk është kuptuar si duhet, madje as nga perspektivat letrare, artistike dhe kinematografike, ndërsa duhej parë në shumë aspekte".
Interpretime të ndryshme
Kjo grua e vetme simbolizon shumë figura femërore: shenjtore, pendestare, eremite, simbole të mëkatit dhe të pendesës, besnikërisë, vuajtjes dhe dashurisë, mishërimit dhe shenjtërisë. Secili prej këtyre aspekteve është i pranishëm në veprat e ekspozuara në këtë udhëtim të paparë ikonografik, biblik dhe kulturor: ashtu si emrat e artistëve vendas, deri tek ato të mjeshtrave të mëdhenj, të njohur botërisht.
Nga traditat lokale, në ato universale
"Ne filluam duke studiuar rajonin tonë, ku kulti i Marisë Magdalenë është ndjerë që nga Mesjeta. Maria Magdalenë - vazhdon Brancato - është e pranishme në Manastirin e Shpirtit Shenjt, në ato afreske të mrekullueshme të shekullit të 14-të. Por edhe në tavanet tona prej druri të shekullit të 15-të. Ajo prek edhe heraldikën, duke u bërë stema e qytetit të Sciacca-s: për këtë rast, ne ekspozuam një flamur të restauruar së fundmi. Është stema e lashtë e Sciacca-s me Magdalenën ndërmjet luanëve. Devocioni popullor vendas përfaqësohet mirë në ekspozitë, me instalimin e posterave të Cammarata-s dhe pikturat e devotshme të Fra Felice da Sambuca-s."
Kryeqyteti i Kulturës, në Vitin Jubilar
Në një vit të rëndësishëm për Agrigenton i cili, përveç kremtimit të Jubileut, është Kryeqyteti Italian i Kulturës, nuk mund të mungonin emra të mëdhenj: Guercino, Cecco del Caravaggio, Nicolas Regnier, Mattia Preti, Francesco Hayez, për të përmendur vetëm disa.
Il Guercino i Muzeve të Vatikanit
"Jemi të nderuar që kemi praninë e emrave me autoritet në historinë e artit italian, si Guercino - thotë drejtori - "Muzetë e Vatikanit po vënë në dispozicion një nga veprat më të rëndësishme në koleksionin e tyre, e cila rrallë huazohet. Kjo ndodhi gjatë ekspozitës së fundit të madhe në “Scuderie del Quirinale". Është "Shën Maria Magdalena e Penduar" - vaj mbi kanavacë. "Vepër mahnitëse! Poezi e pastër. Ajo përfaqëson fazën e pjekur të karrierës profesionale të artistit: përvetësimin e përkryer të klasicizmit".
Kryevepra të huazuara nga muzetë kryesorë
"Përkrah Guercinos, i cili është krenaria e ekspozitës" - vazhdon ai - "ka vepra shumë të vlefshme që ndjekin një rrugë kohore, historiko-artistike përmes evolucionit ikonografik të Magdalenës. Një panel mesjetar, gotik i vonë, me një sfond të artë, nga Muzeu Kombëtar i Pizës, vepër e Giovanni Di Pietros", që pikturon gruan tek këmbët e kryqit, është figurë kryesore në pikturën toskane ndërmjet shekujve të 14-të dhe 15-të. "Kemi edhe dy vepra nga Andrea Vaccaro, secila me një ndikim të ndryshëm dramatik. Njëra vjen nga Palazzo Abatellis dhe tjetra nga Muzeu San Matteo në Salerno. Galeria Kombëtare e Artit Antik Barberini-Corsini në Romë është gjithashtu e përfshirë në huazimin e Cecco di Caravaggio-s, një vepër e shekullit të 17-të, "ndoshta më sensuale nga ato që janë ekspozuar". E është edhe Mattia Preti me një kanavacë të vitit 1699 nga Fondacioni Carìt: Magdalena qan, ndërsa sodit dy gozhda nga kryqi i Krishtit, por pavarësisht subjektit pendestar, e qara mbetet himn lavdërimi për bukurinë femërore.
Nga drama - në poezi
Shtegtimi kronologjik përfundon me Kryqëzimin e Pietro Hayez nga Muzeu Dioqezan i Milanos: "Jemi në mes të romantizmit dhe prekim akordet e poezisë së pastër" - vëren Domenica Brancato. Artisti pikturon Krishtin dhe Maria Magdalenën të zhytur në heshtje absolute, ku dhimbja sublimohet në bukurinë formale dhe fuqinë evokuese të çastit.
Bibla, prijëse në rrugën e dashurisë
Veprat shoqërohen me fragmente nga Bibla. "Zjarri i Dashurisë", që i jep ekspozitës titullin, të kujton figurën e Maria Magdalenës e cila, nga mëkatare, shndërrohet dhe ngrihet përsëri në këmbë, duke ndjekur Krishtin. Duke shfletuar Jereminë Profet, lexojmë: "Por në zemrën time kishte diçka si zjarr që digjej brenda kockave të mia; u përpoqa ta mbaja brenda, por nuk munda" (Jeremia 20:7-9). "Ekspozita është një paralajmërim për të gjitha ndërgjegjet tona", thekson drejtoresha.
Pasuria e muzeve dioqezane
Ekspozita, e hapur çdo ditë deri më 30 tetor, thekson rëndësinë e muzeve dioqezane parë si pika referimi për rizbulimin e rrënjëve të krishtera të zonës: "Janë institucione të vogla, të veçanta dhe në rritje". "Por kanë mundësinë" - vëren Drejtoresha Brancato - ta përmirësojnë trashëgiminë historike dhe artistike dhe të krijojnë nisma baritore për zonën, me ndikim të rëndësishëm shoqëror".
