Selia e Shenjt? n? OKB: shpenzimet ushtarake u heqin burime vendeve m? t? varfra
R.SH. – Vatikan
Ekzistojnë realitete që shpesh ushqejnë njëra-tjetrën dhe që paraqesin pengesa serioze për ruajtjen e paqes dhe sigurisë ndërkombëtare: janë varfëria, nënzhvillimi, konfliktet, sfida të ndërlidhura që duhen trajtuar në shkaqet e tyre më të thella për t'u ofruar brezave të rinj një zhvillim integral dhe një paqe të qëndrueshme. Selia e Shenjtë, e cila ndërhyri të hënën më 23 qershor në Nju Jork në debatin e Këshillit të Sigurimit të OKB-së me temë "Varfëria, Nënzhvillimi dhe Konflikti: Implikimet për Ruajtjen e Paqes dhe Sigurisë Ndërkombëtare", vuri në dukje se, në Agjendën 2030 për zhvillimin e qëndrueshëm, bashkësia ndërkombëtare pranon se në realitetin e sotëm eliminimi i varfërisë në të gjitha format dhe dimensionet e saj është "sfida më e madhe globale dhe një kërkesë thelbësore për zhvillimin e qëndrueshëm".
Ky angazhim i përbashkët, thuhet në deklaratë, "nënvizon përgjegjësinë urgjente morale për të trajtuar shkaqet rrënjësore të varfërisë që shpesh lidhen me padrejtësinë, përjashtimin dhe mohimin e të drejtave themelore".
Selia e Shenjtë kujton se që në vitin 1967 Papa Pali VI deklaroi profetikisht se "zhvillimi është emri i ri i paqes" (Populorum progressio, 76), ndërsa Përmbledhja e Doktrinës Sociale të Kishës thekson se "paqja nuk është thjesht mungesë lufte" (494), por përkundrazi, siç u shpjegua në Këshillin e Sigurimit të Kombeve të Bashkuara, zhvillimi qëndron në "promovimin aktiv të vëllazërisë njerëzore, bashkëpunimin dhe prosperitetin e përbashkët për të gjithë".
Shqetësimi për shpenzimet ushtarake
Zhvillimi i plotë njerëzor përfaqëson, pra, "jo vetëm një imperativ moral për të gjithë njerëzimin, por edhe një rrugë konkrete drejt një paqeje më të drejtë, gjithëpërfshirëse dhe të qëndrueshme". Në këtë drejtim, Selia e Shenjtë shprehu në OKB shqetësimin e saj "për rritjen e shpenzimeve ushtarake që largojnë burime të konsiderueshme nga investimet në sektorët e zhvillimit si shëndetësia, arsimi dhe infrastruktura".
Në këtë kontekst, Selia e Shenjtë ripohon propozimin e saj për krijimin e një fondi global të financuar pjesërisht duke ridistribuar burimet e destinuara aktualisht për armatimet. "Një fond i tillë – është bindja – mund të japë një kontribut të rëndësishëm në çrrënjosjen e varfërisë dhe urisë dhe në promovimin e zhvillimit në rajonet më të pafavorizuara të botës. Kjo do të favorizonte një rrugë më të drejtë dhe të qëndrueshme drejt paqes dhe do të mbronte dhe promovonte dinjitetin njerëzor".
Një paqe e qëndrueshme kërkon një angazhim për zhvillimin e plotë njerëzor që "mbështet dinjitetin e dhënë nga Zoti çdo personi dhe promovon kushtet e nevojshme për drejtësinë, solidaritetin dhe mirëqenien e të gjithëve". Selia e Shenjtë e përfundoi deklaratën e saj duke theksuar rëndësinë e vendosjes së zhvillimit të plotë njerëzor "në qendër të rishikimit aktual të arkitekturës për ndërtimin e paqes" dhe të promovimit të një bashkëpunimi të forcuar midis shteteve anëtare në shërbim të paqes.
