Zgjedhja e Pap?s, nga tymi i bardh? - tek “Habemus Papam”
R.SH./ Vatikan
Tymi i bardhë nga oxhaku i Kapelës Sikstine u njofton besimtarëve dhe botës se u zgjodh Ipeshkvi i ri i Romës, pasardhës i Pjetrit. Por çfarë ka ndodhur nën mjediset e afreskuara nga Mikelanxhelo disa minuta më parë, e çfarë do të ndodhë deri në shpalljen e emrit të Papës së ri, shqiptuar pas “Habemus Papam” nga Lozha e Bekimeve e Bazilikës së Shën Pjetrit nga protodiakoni, kardinali francez Dominique Mamberti?
Riti i pranimit
Në bazë të asaj, që është përcaktuar dhe rregulluar nga Ordo rituum Conclavis dhe Kushtetuta Apostolike Universi Dominici Gregis, njëri nga kardinajtë e pranishëm në Kapelën Sikstine arrin shumicën e kërkuar të votave gjatë votimit, që zhvillohet në mënyrë kanonike. I pari i kardinalëve, sipas radhës dhe vjetërsisë, ose i dyti, nëse është zgjedhur, në emër të të gjithë Kolegjit të zgjedhësve kërkon, në latinisht, pëlqimin e të zgjedhurit me fjalët e mëposhtme: “A e pranon zgjedhjen kanonike si Papë Suprem?”. E, sapo merr pëlqimin, i bën pyetjen: "Si dëshiron të të thërrasin?". Atëhere mjeshtri i Kremtimeve Liturgjike Papnore, me detyrën e noterit e duke pasur dy ceremonierë si dëshmitarë, harton një dokument, që dëshmon pranimin e Papës së ri si dhe emrin që mori.
Përfundimi i Konklavit
Konklavi, siç saktëson Kushtetuta Apostolike Universi Dominici Gregis, përfundon pasi Papa i ri jep pëlqimin për zgjedhjen, "përveçse kur vendos ndryshe". Atëhere zëvendësi i Sekretarisë së Shtetit të Vatikanit, Sekretari për Marrëdhëniet me Shtetet a kushdo tjetër që duhet të merret me Papën e zgjedhur për çështjet e nevojshme në atë çast, mund të hyjë në Kapelën Sikstine.
Tymi i Bardhë dhe “Dhoma e Lotëve”
Pasi përfundon riti i pranimit, të gjitha fletët e votimit dhe dokumentet e tjera të përdorura për zgjedhjen digjen: tymi i bardhë dëshmon se u zgjodh një Papë i ri. Ndërsa besimtarët në Sheshin e Shën Pjetrit duartrokasin dhe e gjithë bota pret të mësojë emrin e Papës së ri, Papa i zgjedhur largohet nga Kapela Sikstine dhe hyn në të ashtuquajturën "Dhoma e Lotëve". Këtu, me ndihmën e Mjeshtrit të Kremtimeve Liturgjike, zgjedh njërën nga tri petkat papnore, të përgatitura prej kohe.
Kremtimi i parë, nderimet dhe “Te Deum”
Me kthimin e tij në Kapelën Sistine, Papa i sapozgjedhur ulet në katedër. Zhvillohet sakaq një ceremoni e shkurtër, e cila fillon me përshëndetje nga kardinali i parë i Urdhrit të Ipeshkvijve. Më pas i pari nga kardinajtë presbiter lexon një fragment nga Ungjilli, që mund të jetë "Ti je Pjetër-Shkëmb dhe mbi këtë shkëmb do të ndërtoj Kishën time" ose "Kulloti delet e mia!". E së fundi, kardinali protodiakon lutet për Pasardhësin e sapozgjedhur të Pjetrit. Pastaj të gjithë kardinajtë zgjedhës të pranishëm, sipas rendit të përparësisë, kalojnë pranë Papës së ri për të treguar respektin dhe bindjen e tyre. Pastaj, së bashku me Papën e sapozgjedhur, këndojnë himnin “Te Deum”.
Lutja e Papës së ri në Kapelën e Shën Palit
Kardinali Protodiakon Dominique Mamberti arrin në Lozhën e Bekimit dhe njofton popullin për zgjedhjen dhe emrin e Papës së ri me formulën “Annuntio vobis gaudium magnum: habemus Papam!”- “Po ju njoftoj një lajm të gëzueshëm: kemi Papën!”. Ndërkohë, Papa i zgjedhur, ndërsa largohet nga Kapela Sikstine për të shkuar në Lozhë, hyn në Kapelën Pauline, ku ndalet për t'u lutur në heshtje, para të Shenjtnueshmit Sakrament, e pastaj rifillon ecjen drejt Lozhës, nga ku i drejton përshëndetjen turmës brohoritëse dhe i jep bekimin e parë apostolik "Urbi et Orbi".
