Lutje p?r Pap?n n? Vatikan. Sot, Rruzarja udh?hiqet nga kardinali Roche
R.SH. – Vatikan
Mbrëmja e nëntë, që mbledh besimtarët në Sheshin e Shën Pjetrit në Vatikan, në lutje për shëndetin e Papës Françesku, i cili ndodhet i shtruar në Poliklinikën universitare Gemelli të Romës, që nga 14 shkurti. Rruzaren e sotme e udhëheq prefekti i Dikasterit vatikanas për Kultin Hyjnor dhe Disiplinën e Sakramenteve, kardinali anglez Arthur Roche.
Mbrëmë, Papa iu besua dashurisë amënore të Zojës, nga prefekti i Dikasterit për Ipeshkvijtë, kardinali Robert Prevost, i cili udhëhoqi Rruzaren e 3 marsit. Prelati nënvizoi se Virgjëra, “Nëna e Shpresës Shenjte, ndihmon, rigjallëron dhe ngushëllon të gjithë ata, që i drejtohen për ndihmë”. Para fugures së “Marisë, Nënës së Kishës”, vendosur në tremen e Bazilikës së Shën Pjetrit, prefekti drejtoi lutjen mariane në prani të kardinajve, ipeshkvijve, prelatëve, meshtarëve e rregulltarëve të Kuries Romake dhe të dioqezës së Romës, si edhe të qindra besimtarëve, të cilët mblidhen çdo ditë, nga ora 21.00, që të luten për shërimin e Papës Françesku, duke kërkuar ndërmjetësimin e Zojës.
Pasi meditoi mbi misteret e gëzimit dhe tha lutjen e Mbretëreshës Qiellore, në fund të Litanive lauretane, kardinali Prevost iu lut Zotit të dërgojë Shpirtin e Tij "për të na ndihmuar në dobësinë tonë, që, duke ngulmuar në fe, të duam më shumë e të ecim së bashku drejt horizontit të shpresës së lume". Së fundi, asambleja këndoi himnin "Oremus pro Pontifice nostro".
