Bullgari: takimi i par? i Patriarkut Ortodoks Daniil me Nuncin Suriani
R.SH. / Vatikan
Më 6 shkurt, Patriarku ortodoks bullgar Daniel u takua për herë të parë me Nuncin Apostolik, Imzot Luciano Suriani, në Pallatin Sinodal në Sofje. Të pranishëm në takim, edhe Mitropoliti i Veliko Tërnovës, Gregori; Mitropoliti për Evropën Perëndimore, Anthony; Sekretari i Përgjithshëm i Sinodit të Shenjtë, peshkopi Gerasim si dhe Atë Ivan Ivanov, administrator kishtar i famullive ortodokse Bullgare në Itali.
Urimet e Papës
Imzot Suriani i përcolli Patriarkut urimin e Papës Françesku për zgjedhjen dhe kurorëzimin e tij dhe i uroi mision të mbarë si kreu i Kishës Ortodokse Bullgare. Gjatë takimit u ripohuan marrëdhëniet e mira ndërmjet Kishës Ortodokse Bullgare dhe Selisë së Shenjtë dhe u shkëmbyen falënderime lidhur me sigurimin e objekteve të kultit për shërbesat liturgjike të famullive ortodokse bullgare, nga Kisha Katolike në Evropën Perëndimore.
Drejtuesit e Kishës Ortodokse kujtuan nismat e shumta të përbashkëta, si dhurimin e relikeve të Shën Potitit të Serdikës dhe Shën Klementit, në vitin 2020, nga Papa Françesku, aktualisht në kishën e Shën Sofisë. Patriarku Danil vuri në dukje historinë e gjatë të marrëdhënieve vëllazërore ndërmjet Kishës Ortodokse Bullgare e Kishës Katolike dhe pohoi se pavarësisht dallimeve, duhet të ecim drejt Atij, që na bashkon: Zotit tonë Jezu Krisht. Takimi u mbyll me urimet e Vitit të Ri dhe me shpresën që Zoti të bekojë nisma të mira në favor të Kishës së Krishtit.
