Papa: mjaft me luft?n. T? mos tundohemi nga arm?t, mund t? biem n? barbari
R.SH. – Vatikan
Të fuqishme, fjalët e Papës Leoni XIV në fund të audiencës së sotme të përgjithshme, kundër luftës e vuajtjeve të popullsive në anë të ndryshme të botës. Ati i Shenjtë kujton Papët paraardhës, duke denoncuar sërish tmerrin, që sjell çdo konflikt, sidomos në këtë epokë të teknologjive të përparuara.
“Të dashur vëllezër dhe motra, zemra e Kishës thyhet nga britmat, që lartohen në vendet e luftës, veçanërisht, në Ukrainë, Iran, Izrael, Gaza. Nuk duhet të mësohemi me luftën, përkundrazi, duhet ta hedhim poshtë si tundim joshjen nga armatimet e fuqishme dhe të sofistikuara”.
Rreziku i barbarive
Fjalë, që kujtojnë rrezikun atomik, tejet i pranishëm këto ditë, sidomos pas rritjes së tensioneve në Lindjen e Mesme, me sulmet ndërmjet Izraelit dhe Iranit. Dje, edhe ndërhyrja e presidentit të SHBA-së, Donald Trump, i cili e kërcënoi Iranin të heqë dorë menjëherë nga programi bërthamor, përndryshe Uashingtoni do të ndërhyjë përkrah Izraelit për të hedhur poshtë regjimin e ajatollahëve. Një epokë me rrezik për të gjithë njerëzimin, e cila, për Papën Leoni XIV, mund të kompromentojë të ardhmen e botës.
“Meqenëse në luftën e sotme përdoren armë shkencore të të gjitha llojeve, mizoria e saj kërcënon t'i çojë palët ndërluftuese në barbari shumë më të mëdha se në të kaluarën”.
Thirrjet e Françeskut dhe të Piut XII
Më pas, Ipeshkvi i Romës u bën thirrje drejtpërdrejt krerëve të kombeve, në vazhdën e Papëve, që e kanë ngritur zërin kundër luftës.
“Në emër të dinjitetit njerëzor dhe të së drejtës ndërkombëtare, u përsëris përgjegjësve të botës fjalët, që thoshte shpesh Papa Françesku: lufta është gjithmonë disfatë! E, edhe me Papën Piun XII: ‘Asgjë nuk humbet me paqen. Gjithçka mund të humbasë me luftën’”.
Një familje e vetme njerëzore
Papa e përsërit thirrjen e tij për paqe edhe gjatë përshëndetjeve për delegacionin ndërkombëtar të "Hope80", shoqatë e impenjuar për të nxitur pajtimin, sidomos këtë vit, që shënon 80-vjetorin e përfundimit të Luftës II Botërore: "Flaka e dashurisë hyjnore dhe e vëllazërimit - u lut Ati i Shenjtë – u djegtë gjithnjë me intensitet në zemrat e burrave dhe grave të familjes sonë të vetme njerëzore".
