Papa: t? themi Rruzaren p?r ata q? vuajn? ?mendurin? e luft?s
R.SH. – Vatikan
Pasi u lut, të dielën e kaluar, në bazilikën e Zojës së Madhe, për ndërmjetësimin e Shën Marisë Salus Populi Romani, nga sheshi i Shën Pjetrit, Papa Françesku bëri edhe një herë ftesën për të thënë Rruzaren Shenjte, që të ndalen të gjitha konfliktet në botë. Para se të përfundonte audiencën e sotme të përgjithshme, gjatë përshëndetjeve për shtegtarët italianë, Ati i Shenjtë u kërkoi besimtarëve ta vlerësojnë "lutjen tradicionale mariane", në këtë muaj, që i kushtohet pikërisht Rruzares.
“Ju nxis të gjithëve ta thoni Rruzaren çdo ditë, duke e lëshuar veten me besim në duart e Marisë. Asaj nëne të kujdesshme ia besojmë vuajtjet dhe dëshirën për paqe të popullsive, që pësojnë çmendurinë e luftës”.
Mendimi i Papës shkoi në vendet më të plagosura nga armiqësia dhe dhuna, të cilat i vuri në dukje një nga një: "Ukraina e martirizuar, Palestina, Izraeli, Mianmari, Sudani".
Të njëjtën thirrje për lutje, Papa e bëri edhe gjatë përshëndetjeve për besimtarët gjermanë, që i nxiti ta lënë Zojën t’i udhëheqë, përmes Rruzares, "drejt birit të saj Jezu Krisht, si edhe të luten së bashku për paqen në botë e për unitetin e Kishës”. Ndërsa, duke iu drejtuar shtegtarëve frankofonë dhe arabë, Françesku i inkurajoi që, "si Kishë sinodale në udhë drejt Krishtit", t'i kërkojnë "Shpirtit Shenjt hirin për të qenë mjete bashkimi dhe paqeje”.
